Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 149 Hüküm no: 109 Orijinal metin no: [15a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Reis b. Ömer’in köle diye satın aldığı Ayşe bt. Hacı Mehmed’in hür olduğunu ispat ettiğinden Hüseyin Reis’in müdahalesinin menedildiği Rıkka inkıyâdı sebk etmekle vech-i âtî üzere da‘vâya kıbel-i şer‘den me’zûne olan uzun boylu açık kaşlı kara gözlü Âişe bt. el-Hâc Mehmed Semân meclis-i şer‘-i şerîf-i enverde kendiye rakīka olmak üzere vâzı‘u’l-yed olan Hüseyin Reis b. Ömer muvâcehesinde üzerine da‘vâ ve takrîr-i kelâm edip ben Ka‘be-i mükerreme şerefehallâhu te‘âlâda Kuşâşiye Mahallesi’nde sâkin hürrü’l-asl olan mezkûr Mehmed Semân’ın firâşından [15b] hâsıla ve kezâlik hürretü’l-asl olan zevce-i menkûhası Emine’den mütevellide olup bana ve ebeveynim mezkûrâna kat‘â rık târî olmayıp hürretü’l-asl iken hâlâ mezkûr Hüseyin Reis rakīka olup câriye-i memlûkesi olmak üzere vaz‘-ı yed eder suâl olunup üzerimden yed-i mübtililesini izâle ve kasr-ı yedine tenbîh olunmak matlûbumdur dedikde gıbbe’s-suâl mezkûr Hüseyin Reis cevâbında müdde‘iye-i mezkûreyi işbu hâzır bi’l-meclis Ömer Çelebi b. Osman nâm kimesneden yüz otuz guruş semen-i medfû‘ ve makbûza bundan akdem iştirâ edip mülk-i müşterâm olmağla rakīka olmak üzere vaz‘-ı yed ederim deyü müdde‘iye-i mezkûrenin ber-vech-i meşrûh hürre olduğunu inkâr edicek müdde‘iye-i mezkûreden müdde‘âsına beyyine taleb olundukda fi’l-asl Mekke-i mükerreme’de Sûku’l-leyl Mahallesi sükkânından olup mahmiye-i İstanbul’da Tahtakale’de vâki‘ Yeni Han’da sâkin Said b. Cum‘a el-Hanbelî ve Bâbü’ş-şâşûr Mahallesi sükkânından olup hâlâ han-ı mezkûrda sâkin Mehmed b. Ahmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka işbu müdde‘iye-i mezkûre Ka‘be-i mükerreme’de Kuşâşiye Mahallesi’nde sâkin hürrü’l-asl olan mezkûr el-Hâc Mehmed Semân nâm kimesnenin firâşından hâsıla ve zevcesi hürretü’l-asl olan Emine nâm hatundan mütevellide olup müdde‘iye-i mezkûreye ve ebeveyni mezkûrâna kat‘â rık târî olmayıp hürretü’l-asldır biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince baʻde’l-hükm mezkûr Hüseyin Reis’in yed-i mübtililesinin izâlesine tenbîh olunmağın mâ-hüve’l-vâki‘ bi’t-taleb ketb olundu. Fî 19 min-şehri Rebîʻülâhir sene 1121 Şuhûdü’l-hâl: Mustafa Çelebi b. Şa‘ban, Ali Çelebi b. İvaz, Mustafa Efendi el-Kādı, Hüseyin Çelebi b. Hasan, Abdullah Efendi b. Mehmed Efendi, el-Hâc Mustafa Efendi b. Hüseyin, el-Hâc Mehmed Çelebi b. Abdülkerim ve gayruhum mine’l-huzzâr.