Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 150 Hüküm no: 110 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa b. Abdülmennan’ın Çukur Mahallesi’ndeki evini Ahmed Ağa b. Hüseyin’e sattığı Mahmiye-i İstanbul’da Yenikapı dâhilinde Çukur Mahallesi’nde sâkin fahrü’l-akrân Ahmed Ağa b. Abdülmennan nâm kimesne meclis-i şer‘-i şerîf-i enverde işbu bâ‘isü’l-kitâb diğer Ahmed Ağa b. Hüseyin Ağa mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafdan karındaşım Ali Ağa mülkü ve bir tarafdan imâma meşrûta vakıf menzil ve bir tarafdan el-Hâc Halil mülkü ve bir tarafdan tarîk-i âm ile mahdûd hâriciyede fevkānî bir bâb şehnişînli oda ve bir bâb sagīr oda ve tahtında bir bâb ahır ve bir abdesthâne ve bir kenîf ve dâhiliyede tabaka-i ulyâda iki bâb fevkānî oda ve bir bâb sagīr kiler odası ve bir sofa ve bir kenîf ve bir kaygan döşemeli dehlîz ve bir sofa ve tabaka-i vustâda bir bâb oda ve bir matbah odası ve bir gasilhâne ve bir tahta-pûş ve bir sofa ve dehlîz ve tabaka-i süflâda bir kenîf ve bir su kuyusu ve bir mikdâr havlu ve karındaşım Ali Ağa tarafında taş duvarı muhtevî mülk menzilimi tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile bin iki yüz yirmi guruşa merkūm diğer Ahmed Ağa’ya bey‘ ve teslîm ve temlîk eylediğimde ol dahi ber-vech-i muharrer iştirâ ve temellük ve teslîm ve kabûl ve kabz eylediğinden sonra semeni olan meblağ-ı mezbûr bin iki yüz yirmi guruşu merkūm diğer Ahmed Ağa yedinden tamamen ahz u kabz eyledim baʻde’l-yevm menzil-i mahdûd-ı mezkûr bi-cümleti’t-tevâbi‘ ve’l-levâhık mezbûr diğer Ahmed Ağa’nın mülk-i müşterâsı olmuşdur benim kat‘â alâka ve medhalim yokdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu Fî 20 min-şehri Rebîʻülâhir sene 1121 Şuhûdü’l-hâl: el-Hâc İbrahim Efendi mukāta‘a-i Haremeyn-i muhteremeyn sâbıkā, Fahrü’l-akrân Ahmed Ağa b. ( ) Ağa-yı Serdengeçdi, Abdurrahman Efendi İmâm-ı Mescid-i Sirkeci, Mehmed Çelebi b. Abdullah, Berber Mehmed Çelebi b. Hayreddin, İsmail Çelebi b. Mehmed an-Kasımpaşa, Mehmed Çelebi b. Abdullah tâbi‘-i İbrahim Efendi, Mustafa Çelebi b. Şa‘ban an-Galata, Mehmed Efendi el-İmâm ve gayruhum mine’l-huzzâr.