Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 151 Hüküm no: 111 Orijinal metin no: [15b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı İbrahim b. Hacı Ahmed’in üzüm bedellerinden alacağı olduğu parayı Hoşabcı Osman b. Mustafa’nın ödemesi Mahmiye-i İstanbul’da Debbâğ Yunus Mahallesi sükkânında el-Hâc İbrahim b. el-Hâc Ahmed nâm kimesne meclis-i şer‘-i şerîf-i enverde Hoşâbcı Osman b. Mustafa nâm kimesne muvâcehesinde üzerine da‘vâ ve takrîr-i kelâm edip mezkûr Osman zimmetinde kantar ve vezni beynimizde ilm-i şer‘î ile ma‘lûm İzmir siyahı üzüm ve Mandalyat üzümü bahâlarından ba‘de külli’l-hesâb yüz yetmiş iki guruş ve beş sümün guruş hakkım olup hâlâ taleb eylediğimde bana edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezkûr Osman cevâbında müdde‘î-i mezkûra cihet-i mesfûreden el-ân zimmetinde bâkī yüz yetmiş iki guruş ve beş sümün guruş deyni olduğunu tâyi‘an ikrâr u i‘tirâf etmeğin alâ-mûcibi i‘tirâfihî meblağ-ı mezkûr yüz yetmiş iki guruş ve beş sümün guruşu müdde‘î-i mezkûr el-Hâc İbrahim’e edâ ve teslîme mezkûr Osman’a ba‘de’t-tenbîh mâ-hüve’l-vâki‘ bi’t-taleb ketb olundu. Fî 18 min-Rebîʻülâhir sene 1121 Şuhûdü’l-hâl: Mustafa Çelebi b. Şa‘ban, Ali Çelebi b. İvaz, Hüseyin Çelebi b. Hasan, Osman Çelebi b. Hasan ve gayruhum mine’l-huzzâr.