Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 152 Hüküm no: 112 Orijinal metin no: [15b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mustafa Ağa b. Seyyid Ali’nin alacaklısı olduğu Huri bt. Abraham’ın borcunu ödemesi Mahmiye-i İstanbul’da Mahmud Paşa Mahallesi’nde sâkin işbu râfi‘u’l-kitâb es-Seyyid Mustafa Ağa b. es-Seyyid Ali nâm kimesne meclis-i şer‘-i şerîf-i enverde Huri bt. Abraham nâm Nasrâniye muvâcehesinde üzerine da‘vâ ve takrîr-i kelâm edip merkūm Huri’ye bundan akdem iki yüz guruşluk tuğralı altınımı ikrâz ve teslîm ol dahi iktirâz ve kabz ve istihlâk ettiğinden sonra meblağ-ı mezbûrun yirmi beş guruşunu ahz ve istîfâ edip yüz yetmiş beş guruşu zimmetinde bâkī kalmağla suâl olunup meblağ-ı bâkī-i mezbûr yüz yetmiş beş guruşun alıverilmesi matlûbumdur dedikde gıbbe’s-suâl merkūme Huri cevâbında fi’l-hakīka kaziyye minvâl-i meşrûh üzere olup müdde‘î-i mezbûra cihet-i karzdan zimmetimde bâkī yüz yetmiş beş guruş el-ân zimmetimde lâzımü’l-kazâ deynimdir deyü tâyi‘aten ikrâr u i‘tirâf etmeğin mûcebince meblağ-ı bâkī-i mezbûr yüz yetmiş beş guruşu müdde‘î-i mezbûra edâ ve teslîme merkūm[e] Huri’ye tenbîh-birle mâ-vaka‘a bi’t-taleb ketb olundu. Fî 21 min-şehri Rebîʻülâhir sene 1121 Şuhûdü’l-hâl: el-Hâc Mustafa Efendi b. ( ), Mehmed Efendi el-Kâtib, el-Hâc Hüseyin Beşe b. ( ), Mehmed Çelebi b. ( ) ve gayruhum mine’l-huzzâr.