Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 152 Hüküm no: 113 Orijinal metin no: [15b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Canbaziye Mescidi’nin vefât eden mütevellîsi Süleyman Çelebi b. Osman tarafından yapılan tamiratında bazı usûlsüzlükler yapıldığının vakfın mütevellî kaymakamı Ali Efendi b. Mustafa’nın şikayeti üzerine ikinci defa yapılan tamirat keşfi Husûs-ı âti’l-beyânın mahallinde keşf ve takvîm ve tahmîni bâbında fermân-ı şerîf sâdır olmağın imtisâlen-leh savb-ı şer‘den irsâl olunan Mevlânâ Ali Efendi hâlâ Ser-mi‘mâr-ı Hâssa Mehmed Efendi b. Halil ve Mehmed Halîfe b. Ali ve Mi‘mâr Kâtibi Mehmed Efendi ile mahmiye-i İstanbul’da Avratpazarı kurbünde Canbaziye Mescid-i şerîfi’ne varıp ebniye ve sukūf ahvâline vukūfu olan Müslimîn muvâcehesinde akd-i meclis-i şer‘-i nebevî eyledikde mescid-i mezkûrun evkāfına sâbıkā mütevellî olup fevt olan Süleyman Çelebi b. Osman’ın verâseti zevce-i metrûkesi Havvâ bt. Abdullah nâm hatun ile kebîre kızı Fâtıma’ya [16a] ve li-ebeveyn karındaşı oğulları Mehmed ve Osman’a münhasıra olduğu şer‘an zâhir ve mütebeyyin oldukdan sonra vakf-ı mezkûra hâlâ kāimmakām-ı mütevellî olan Ali Efendi b. Mustafa nâm kimesne meclis-i ma‘kūd-ı mezkûrda kendi tarafından asıl ve kızı mezkûre tarafından vekîl olduğu zât-ı mezkûreyi ma‘rifet-i şer‘iyye ile ârifân İmâm Mehmed Efendi b. Şa‘ban ve Mehmed Çelebi b. Ahmed şehâdetleriyle şer‘an sâbit olan mezkûre Havvâ muvâcehesinde takrîr-i kelâm edip müteveffâ-i mezkûr Süleyman Çelebi hayâtında vakf-ı mezkûra mütevellî olduğu hâlde taraf-ı şer‘den me’zûnen mescid-i mezkûrun baʻzı mevâzi‘ini ta‘mîr ve baʻzı mevâzi‘ini müceddeden binâ ettirip bâ-fermân-ı âlî ve izn-i şer‘ ve mi‘mâr ağa ma‘rifetiyle keşf ve hüccet ve masrûfu yetmiş beş bin iki yüz doksan akçeye bâliğ olup lâkin keşf-i mezkûr hevâsına tâbi‘ kimesneler ile olup ta‘mîr ve binânın cümlesinde ziyâde bahâ ile tahmîn olunduğundan mâ‘adâ henüz ta‘mîr ve binâ olunmayan duvar ve sâir mevâzi‘le ta‘mîr ve binâ olunmak üzere keşf ü tahrîr ettirdip vakfa gadr olmağın husûs-ı mezkûru der-i devlet-medâra arzuhâl ve dîvânda murâfa‘a olduğumda alâ-vechi’l-hak tekrar keşf ve takvîm ve tahmîn olunmak üzere musahhah fermân-ı vâcibü’l-imtisâl ve mübâşir ta‘yîn olunmuşdur deyü fermân-ı âlî-şânı ibrâz edip mezkûre Havvâ muvâcehesinde feth ü kırâet olundukdan sonra hüccet-i mezkûreye nazar ve cümle mevâddı ale’l-esâmî tatbîk ederek mi‘mârûn-ı mezkûrûn merkūm Ali Efendi ile mezkûre Havvâ muvâcehelerinde mesâha ve takvîm ve tahmîn eyledikleri üzere küfeki taşından devren on bir zirâ‘ on sekiz parmak ve kadden bir zirâ‘ altı parmak bi-hesâb-ı terbî‘î on zirâ‘ korkuluk taşının zirâ‘ı ikişer yüz yetmişer akçeden dört bin elli akçe ve minârede devren sekiz zirâ‘ yirmi bir parmak ve arzen bir zirâ‘ altı parmak bi-hesâb-ı mezkûr on bir zirâ‘ iki parmak taş döşemenin zirâ‘ı yüz yirmişer akçeden iki bin altı yüz kırk akçe ve döşemeden yukarı külâha varınca devren beş zirâ‘ on altı parmak ve kadden dört zirâ‘ altı parmak minâre kapısı yeri ihrâc olundukda bi-hesâb-ı mezkûr meyl-i devrinin zirâ‘ı yüz yirmişer akçeden iki bin yedi yüz akçe ve bir demir dökme seksen akçe ve sekiz cedîd kandil dökmesi altmışar akçeden üç yüz altmış akçe ve döşemede otuz dokuz kined? yirmişer akçeden yedi yüz seksen akçe ve minâre kapısı üzerinde küfeki taşından bir kemer iki yüz kırk akçe ve devren beş zirâ‘ yirmi iki parmak ve kadden iki zirâ‘ altı parmak bi-hesâb-ı mezkûr on iki zirâ‘ minâre külâhının zirâ‘ı ellişer akçeden altı yüz yirmi dokuz akçe ve külâh-ı mezkûrda bir siren direği yüz altmış akçe ve döşeme tahtında altı zirâ‘ rıhtım üç yüz altmış akçe ve bir alem dört yüz seksen akçe ve altı cedîd minâre kademesi yedi yüz yirmi akçe ve yirmi dört kademe merremmeti kırkar akçeden dokuz yüz altmış akçe ve meyl dibinde iki zirâ‘ sıva yirmi akçe ve yetmiş üç zirâ‘ yelkovan beşer akçeden üç yüz altmış beş akçe ve mescid-i mezkûrun cedîd ve atîk mahlût mecmû‘u bi-hesâb-ı mezkûr dört yüz bir zirâ‘ sakfın zirâ‘ı kırkar akçeden on altı bin kırk akçe ve cümle duvarlarda olan bi-hesâb-ı mezkûr yüz dokuz zirâ‘ derzin zirâ‘ı sekizer akçeden sekiz yüz yetmiş altı akçe ve sokak kapısı üzerinde bi-hesâb-ı mezkûr on iki buçuk zirâ‘ kiremid akdarması üçer akçeden otuz yedi akçe ve bir musallâ taşı ta‘mîri seksen akçe ve üzerine tahta sekiz çam ma‘a çârçûbe iki yüz akçe ve pervâzları cedîd bir sokak kapısı meremmeti ber-vech-i tahmîn yüz elli akçe ve iki beylik taban seksen akçe ve taşra tabakada olan mihrâbda on iki zirâ‘ sıvanın zirâ‘ı altışar akçeden yetmiş iki akçe ve dört Rumeli otuz iki akçe ve bi-hesâb-ı mezkûr yirmi zirâ‘ mahlût tahta döşemenin zirâ‘ı on beşer akçeden üç yüz akçe ve bir kapı eşiği yirmi akçe ve bir kebîr Frengî kilid yüz yirmi akçe ve parmaklık tahtında taşı mevcûd tûlen ve arzen bi-hesâb-ı mezkûr on dört zirâ‘ taş duvarın zirâ‘ı yirmişer akçeden iki yüz seksen akçe ve musluk etrâfında taşı mevcûd bi-hesâb-ı mezkûr on yedi zirâ‘ taş duvarın zirâ‘ı yirmişer akçeden dört yüz otuz beş akçe ve bi-hesâb-ı mezkûr yetmiş iki zirâ‘ kayık başlı parmaklık ma‘a boya on beşer akçeden bin seksen akçe ve bi-hesâb-ı mezkûr on dokuz buçuk zirâ‘ mahlût tahta döşeme ve mismâr ve üstâdiye iki yüz doksan akçe ve kapı üzerinde altmış beşer zirâ‘ ancak aktarma ikişer akçeden yüz otuz altı akçe ve bir sagīr taş tekne yüz yirmi akçe ve çeşme kurbünde taşı mevcûd duvar ma‘a derz ber-vech-i tahmîn beş yüz seksen akçe ve duvar-ı mezkûr üzerinde bi-hesâb-ı mezkûr on bir zirâ‘ sakfın zirâ‘ı yirmi ikişer akçeden yüz otuz üç akçe ve tabuthânede taşı mevcûd bir tarafı derzli bi-hesâb-ı mezkûr dokuz zirâ‘ on sekiz parmak taş duvarın zirâ‘ı yirmi sekizer akçeden iki yüz elli iki akçe ve duvar-ı mezkûr üzerinde altı zirâ‘ tahta döşeme yetmiş iki akçe ve bi-hesâb-ı mezkûr yirmi yedi zirâ‘ tabuthâne sakfı yirmişer akçeden beş yüz kırk akçe ve yirmi zirâ‘ kenîf sakfı akdarması üçer akçeden altmış altı akçe ve iki tarafı sıvalı dört zirâ‘ duvar iki yüz altmış akçe ve beş zirâ‘ taşı mevcûd kârgîr taş duvar iki yüz akçe ve bir çeşme kapısı altmış akçe ve iki lüle seksen akçe ve çeşmede dört kademe taşı üstâdiyesi yüz altmış dört akçe ve bir kürsî taşı yüz kırk akçe ve altı zirâ‘ kurşun boru bin iki yüz akçe ve dört zirâ‘ duvar seksen akçe ve çeşme önünde dört zirâ‘ taş duvar yüz on iki akçe ve iki kâriz bacası tathîri yüz yirmi akçe ve mescid-i mezkûrun cümle boyası ber-vech-i tahmîn bin dokuz yüz yirmi akçe ve dokuz tahta kurşun tahtası on sekizer vakıyyeden yüz seksen vakıyye kurşunun vakıyyesi yirmi ikişer akçeden üç bin dokuz yüz yirmi akçe ve camları mevcûd beş duvar camını çıkarıp yine yerine vaz‘ etmek kenarlarının sıvasıyla yüz akçe ve on sekiz zirâ‘ beyaz sıva sekizer akçeden yüz kırk akçe ve mihrâb tarafında bir duvar camı ma‘a çârçûbe yüz akçe ve mescid-i mezkûrun cümle badanası ber-vech-i tahmîn dört yüz akçe ve otuz zıvana on beşer akçeden dört yüz elli akçe ve ta‘âmiye bin iki yüz akçe ve mu‘temediye dokuz yüz akçe ve kâtibiye dokuz yüz akçe ve harc-ı müteferrika bin beş yüz akçe ve ihrâc-ı mezbele beş yüz akçe ki min-haysü’l-mecmû‘ zikr olunan ebniye ve meremmet ber-vech-i muharrer elli bir bin altı yüz yetmiş akçe ile husûle gelir ziyâdeye tahammülü yokdur deyü mi‘mârûn-ı mezkûrûn ile Müslimîn-i mezbûrîn icmâ‘ u ittifâk eylediklerini mevlânâ-yı mezkûr tahrîr edip ba‘dehû ma‘an ba‘s olunan el-Hâc Hüseyin b. Abdullah ve diğer Hüseyin b. Hasan ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fî 18 min-şehri Rebî‘ülevvel sene 1121 Şuhûdü’l-hâl: Mehmed Efendi b. Şa‘ban, el-Hâc Mehmed b. Osman, el-Hâc Hüseyin b. Mehmed, Abdurrahman Efendi b. Receb, Mehmed Efendi b. Receb, Mehmed Çelebi b. Receb, Mustafa Çelebi b. el-Hâc Osman, Mehmed Çelebi b. Abdullah, Abdullah Çelebi b. Firuz, Mustafa Çelebi b. Abdullah, el-Hâc Mustafa b. Abdullah, Hasan Çelebi b. Mehmed, Mustafa Beşe b. Ahmed, Halil Çelebi b. Ali, el-Hâc Hasan b. Mehmed, Yusuf Çelebi b. Ahmed, Yusuf Çelebi b. Ali, Süleyman Çelebi b. Ali, Mustafa Beşe b. Mahmud, Süleyman Çelebi b. Ömer ve gayruhum mine’l-huzzâr.