Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 155 Hüküm no: 114 Orijinal metin no: [16b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi b. Mahmud’un Debbağ Yunus Mahallesi’ndeki evini Hamamcı Ayşe Hatun bt. Mustafa’ya sattığı Mahmiye-i İstanbul’da Müftî Ali Çelebi Mahallesi sükkânından Mehmed Efendi b. Mahmud meclis-i şer‘-i şerîf-i enverde işbu râfi‘atü’r-rakīm Hamamcı Âişe Hatun bt. Mustafa mahzarında ikrâr ve takrîr-i kelâm edip akd-i âtî sudûruna değin yedimde mülk ve hakkım olup mahmiye-i mezbûrede Debbâğ Yunus Mahallesi’nde vâki‘ bir tarafdan el-Hâc Mehmed b. Receb arsa-yı hâliyesi ve baʻzan diğer el-Hâc Mehmed mülkü ve bir tarafdan yine mezbûr el-Hâc Mehmed arsası ve bir tarafdan mezbûr el-Hâc Mehmed’in köşkü ve baʻzan Kabahasırcı el-Hâc Ali mülkü ve bir tarafdan tarîk-i hâs ile mahdûd iki bâb fevkānî oda ve dehlîz ve bir bâb tahtânî oda ve bir matbah ve kenîf ve bahçe ve etrâf-ı selâsesi taş duvarı ve deryâya nâzır seddi ve sokak kapısını müştemil mülk menzilimi cümle tevâbi‘ ve levâhıkı ve kâffe-i hukūk ve merâfıkı ile tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûre Âişe Hatun’a dört yüz guruşa bey‘ ve teslîm ve temlîk ol dahi vech-i muharrer üzere iştirâ ve tesellüm ve temellük ve kabz ve kabûl eylediğinden sonra semeni olan meblağ-ı mezbûr dört yüz guruşu mezbûr[e] Âişe Hatun yedinden tamamen ahz u kabz eyledim baʻde’l-yevm menzil-i mahdûd-ı mezbûrda alâkam kalmayıp merkūme Âişe Hatun’un mülk-i müşterâsı olmuşdur keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 22 min-şehri Rebîʻülâhir sene 1121 Şuhûdü’l-hâl: İbrahim Ağa b. Ali, el-Hâc Ömer Ağa b. el-Hâc Süleyman Bevvâb-ı sultânî, Hüseyin Ağa b. el-Hâc Halil, Hamamcı Mehmed Ağa b. Mustafa, Süleyman b. Abdullah, Mustafa b. Şa‘ban, Ali Çelebi b. İvaz ve gayruhum mine’l-huzzâr.