Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 155 Hüküm no: 115 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sadi Efendi b. Abdullah’ın Seyyid Hüseyin Çelebi b. Hacı Mehmed ve ortağı Mustafa Bey b. Ahmed’den satın aldığı cariye Fâtıma’nın hamile olduğunun tescil edildiği Mahmiye-i İstanbul’da Tevkī‘î Ca‘fer Çelebi Mahallesi’nde sâkin Sadi Efendi b. Abdullah nâm kimesne meclis-i şer‘-i şerîf-i enverde işbu râfi‘iyü’l-kitâb es-Seyyid Hüseyin Çelebi b. el-Hâc Mehmed ve şerîki Mustafa Bey b. Ahmed nâm kimesneler mahzarlarında üzerlerine da‘vâ ve takrîr-i kelâm edip târih-i kitâbdan üç ay mukaddem mezbûrân es-Seyyid Hüseyin Çelebi ve Mustafa Bey’in yedlerinde câriye-i memlûkeleri olan işbu açık kaşlı kara gözlü orta boylu Efnotiyyü’l-asl? esmerü’l-levn Fâtıma’yı cemî‘ uyûbdan sâlime olmak üzere yüz yirmi yedi guruşa bey‘ ve teslîm ben dahi iştirâ ve tesellüm ve def‘-i semen-i mezbûr etmişidim. Lâkin câriye-i mezbûre mezbûrân yedlerinde iken hâmil olup hâlâ haml zâhir ve haml-i mezbûr uyûbdan ad olunmağın suâl olunup mûceb-i şer‘îsi icrâ olunmak matlûbumdur dedikde evvelen tevcîh-i husûmet için câriye-i mezbûre taraf-ı Devlet-i aliyye’den kābile ta‘yîn olunan Âişe bt. Osman ve Râbia bt. Ahmed nâm hatunlara irâet olundukda onlar dahi ba‘de’n-nazar câriye-i mezbûre el-ân hâmildir deyü ihbâr etmeleriyle gıbbe’s-suâl mezbûrân es-Seyyid Hüseyin ve Mustafa Bey cevâblarında câriye-i mezbûreyi cemî‘ uyûbdan sâlime olmak üzere yüz yirmi yedi guruşa müdde‘î-i mezbûra bey‘ ve teslîm ve kabz-ı semen ettiklerini ikrâr lâkin yanlarında hâmil olduğunu inkâr etmeleriyle kavl-i müftâ-bih üzere bu husûsda şehâdet-i neseb mu‘tebere olmamağın câriye-i mezbûre vaz‘-ı haml edinceye değin tevakkuf olunmak üzere ba‘de’t-tenbîh mâ-vaka‘a bi’t-taleb ketb olundu. Fî-gurreti şehri Rebîʻülâhir sene 1121 Şuhûdü’l-hâl: Mustafa Çelebi b. Şa‘ban, Hasan Çelebi b. Abdullah, Hasan Çelebi b. Mustafa, Abdullah Çelebi b. Mustafa ve gayruhum mine’l-huzzâr.