Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 157 Hüküm no: 117 Orijinal metin no: [16b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alime Hatun bt. Ali’in vefât eden kocası Ali b. Receb ile çocukları Mehmed ve Ahmed’den intikal eden evdeki hissesini azatlı kölesi Belkıs bt. Abdullah’a sattığı Mahmiye-i İstanbul’da el-Hâc Hüseyin Ağa Mahallesi’nde sâkin iken bundan akdem vefât eden Ali b. Receb’in verâseti zevce-i menkûha-i metrûkesi Alime bt. Ali ile sulbî oğulları Ahmed ve Mehmed’e münhasıra olup kable’l-kısmet mezbûr Ahmed dahi vefât edip verâseti vâlidesi mezbûre Alime ile li-ebeveyn karındaşı mezbûr Mehmed’e münhasıra olup kable’l-kısmet mezbûr Mehmed dahi vefât edip verâseti zevce-i menkûha-i metrûkesi Âmine bt. Süleyman ile vâlidesi mezbûre Alime’ye ve sulbî oğlu Mustafa’ya münhasıra ve tashîh-i mes’eleleri bi-tarîkı’l-münâsahati’ş-şer‘iyye bin yüz elli iki sehmden olup sihâm-ı mezbûrdan yüz beş sehmi zevcesi mezbûre Âmine’ye ve dört yüz elli iki sehmi vâlidesi mezbûre Alime’ye ve beş yüz doksan beş sehmi mezbûr Mustafa’ya münhasıra olduğu şer‘an zâhir ve mütehakkık oldukdan sonra mezbûre Alime meclis-i şer‘-i şerîf-i enverde mu‘takası işbu bâ‘isetü’l-kitâb Belkıs bt. Abdullah mahzarında ikrâr ve takrîr-i kelâm edip mahalle-i mezbûrede vâki‘ bir tarafdan baʻzan mahalle-i mezbûre imâmına meşrûta vakıf menzil ve baʻzan Belkıs Hatun mülkü ve bir tarafdan Rahime Hatun veresesi mülkleri ve baʻzan Ali Beşe ve Râbia Hatun mülkleri ve bir tarafdan baʻzan Oruc Beşe mülkü ve baʻzan İsmail Çelebi mülkü ve bir tarafdan tarîk-i âm ile mahdûd dâhiliyede fevkānî üç bâb oda ve bir sofa ve tahtânî iki bâb oda ve bir su kuyusu ve bir matbah ve bir fırın ve bir kenîf ve eşcâr-ı müsmire ve gayr-ı müsmireli bir mikdâr bahçe ve hâriciyede tabaka-i ulyâda bir bâb oda ve süflâda bir bâb oda ve bir dehlîz ve bir şîruganhâneyi muhtevî mülk menzilde olan hisse-i şâyi‘amı tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezbûre Belkıs’a yüz guruşa bey‘ ve temlîk ve teslîm ol dahi ber-vech-i muharrer yedimden iştirâ ve tesellüm ve kabz ve kabûl eylediğinden sonra semeni olan meblağ-ı mezbûr yüz guruş mutâlebesinden mezbûre Belkıs’ın zimmetini ibrâ ve iskāt eyledim fîmâ-ba‘d menzil-i mahdûd-ı mezkûr mezbûre Belkıs’ın mülk-i müşterâsı ve hakk-ı sırfı olmuşdur keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-ışrîn min-şehri Rebîʻülâhir [sene] 1121 Şuhûdü’l-hâl: Es-Seyyid Mehmed Efendi el-Kâtib, Mustafa b. Şa‘ban, Ali b. İvaz, Abdullah b. Abdullah, Ali b. Bâli