Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 158 Hüküm no: 119 Orijinal metin no: [17a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhlis b. Ramazan’dan oğlu Ali’ye intikal eden Mehmed Ağa Evkafı’ndan olan bahçeden dolayı usûlsüz şekilde para alan vakfın kaymakamı Mustafa Ağa b. Abdullah’dan paranın geri alındığı Mahmiye-i İstanbul’da Yedikule kurbünde olan Irgādpazarı Mahallesi sükkânından iken bundan akdem vefât eden Muhlis [b.] Ramazan’ın sulbî oğlu Ali nâm sagīrin vâlidesi ve kıbel-i şer‘-i mergūbdan mansûbe vasîsi olan Sâliha bt. Ebûbekir nâm hatun tarafından husûs-ı âti’z-zikre yedinde olan mazmûnu müsbet hüccet-i şer‘iyye mûcebince vekîl-i sâbitü’l-vekâlesi olan Şahin b. Mehmed nâm kimesne meclis-i şer‘-i şerîf-i enverde Hâfız Ahmed Paşa karındaşı merhûm Mehmed Ağa Evkāfı’nın meşrûtiyet üzere sâbıkā mütevelliyesi Meryem’in kāimmakāmı olan işbu bâ‘isü’l-kitâb Mustafa Ağa b. Abdullah nâm kimesne mahzarında bi’l-vekâle ikrâr ve takrîr-i kelâm edip vakf-ı mezbûr müstagallâtından olup hayâtında icâreteyn-i ma‘lûmeteyn ile müteveffâ-i mezbûrun tasarrufunda olan ma‘lûmü’l-hudûd vakıf bahçe babası müteveffâ-i mezbûrdan intikāl-ı âdî ile sagīr-i mezbûra intikāl etmişiken merkūm Mustafa Ağa sagīr-i mezbûrun vasîsi müvekkilem mezbûre Sâliha Hatun’dan temessük akçesi nâmıyla bi-gayr-ı hakkın otuz guruş ahz u kabz etmekle hâlâ meblağ-ı mezbûru merkūm Mustafa Ağa’dan taleb ve da‘vâ eylediğimde ol dahi inkâr edip beynimizde münâza‘ât-ı kesîre ve muhâsamât-ı şedîde cereyân etmişidi el-hâletü hâzihî beynimize muslihûn tavassut edip ben müdde‘âmı beyâna kādir olmayıp sulh sagīr hakkında her vechile evlâ ve enfa‘ olmağın da‘vâ-yı mezbûrumdan beni mezbûr Mustafa Ağa ile on beş guruş üzerine sulh eylediklerinde ben dahi minvâl-i muharrer üzere sulh-ı mezbûru kabûl ve bedel-i sulh olan meblağ-ı mezbûr on beş guruşu mezbûr Mustafa Ağa yedinden tamamen ahz u kabz edip husûs-ı mezbûra müte‘allik mezbûr Mustafa Ağa ile kat‘â da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-şehri Rebîʻülâhir [sene] 1121 Şuhûdü’l-hâl: Mehmed Çavuş b. Ali, Kara Mehmed b. Abdullah, Hasan Kethüdâ b. Abdurrahman, Hamamcı Halil b. Abdullah, Mustafa Ağa b. Osman, Şa‘ban b. Abdullah, Mehmed b. Davud.