Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 159 Hüküm no: 120 Orijinal metin no: [17a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Palu’nun Dimitri v. Pelaloga’da olan alacağını sulh yoluyla aldığı Mahmiye-i İstanbul’da Fenerkapısı dâhilinde Abdi Subaşı Mahallesi’nde sâkin Nikola v. Palu nâm zimmî meclis-i şer‘-i şerîf-i enverde işbu râfi‘u’s-sifr Dimitri v. Pelalogo nâm zimmî muvâcehesinde ikrâr ve takrîr-i kelâm edip merkūm Dimitri zimmetinde beynimizde ma‘lûm bogası ve astar bahâlarından yüz altmış guruş hakkım olup meblağ-ı mezbûr[u] Dimitri’den taleb ve da‘vâ eylediğimde ol dahi inkâr etmekle beynimizde münâza‘ât-ı kesîre cereyân etmişidi el-hâletü hâzihî beynimize muslihûn tavassut edip da‘vâ-yı mezkûremden beni merkūm Dimitri ile an-inkârin kırk beş guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr kırk beş guruşu merkūm Dimitri yedinden ahz u kabz edip meblağ-ı bâkī-i mezbûra ve târih-i kitâba gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan ben mezbûr Dimitri’nin zimmetini ibrâ ve iskāt eyledim ve mezbûr Dimitri dahi bedel-i sulh olan meblağ-ı mezbûr kırk guruşa müte‘allika âmme-i da‘vâdan benim zimmetimi ibrâ ve iskāt eyledi fîmâ-ba‘d birbirimiz ile vechen mine’l-vücûh kat‘â da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 24 min-şehri Rebîʻülâhir sene 1121 Şuhûdü’l-hâl: Mustafa Çavuş b. Abdullah, Süleyman Çavuş el-Mübâşir, Ömer Ağa b. el-Hâc Abdullah, Mustafa Çelebi b. Şa‘ban, Ali b. Bâli, Ömer Çelebi b. Ahmed, İsmail Çelebi b. Hüseyin, Mehmed b. Ahmed, Ahmed b. Osman.