Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 160 Hüküm no: 122 Orijinal metin no: [17a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar Aleksan v. Torin’in Dimitri v. Mihal’de olan alacağının taksitler halinde ödenmesini kabul ettiği Tüccâr tâifesinden Aleksan v. Torin nâm zimmî meclis-i şer‘-i şerîf-i enverde Dimitri v. Mihal nâm zimmî muvâcehesinde ikrâr ve takrîr-i kelâm edip mezbûr Dimitri zimmetinde cihet-i deyn-i şer‘îden beş yüz altmış guruş hakkım olup meblağ-ı mezbûru merkūm Dimitri hâlâ ve def‘aten edâya iktidârı olmamağın taksît ve te’cîle tâlib olduğundan ben dahi meblağ-ı mezbûrun târih-i kitâbdan yüz seksen gün tamamında kırk guruşun ba‘dehû her senede sekiz guruş verip hesâb-ı merkūm üzere meblağ-ı mezbûr beş yüz altmış guruşu târih-i kitâbdan yedi sene tamamına değin bi’t-tamam edâ ve teslîm etmek üzere taksît ve te’cîl eylediğimde ol dahi kabûl ve müddet-i mezbûre tamamına değin ber-vech-i muharrer mukassaten bi’t-tamam edâya ta‘ahhüd eyledi dedikde gıbbe’t-tasdîkı’l-vicâhî mezbûr Dimitri’nin zevcesi olup zâtı Serkiz v. Arakil ve Arakil v. Tacer nâm zimmîler ma‘rifetleriyle mu‘arrefe olan Pelaşe bt. Mihal nâm Nasrâniye ile Yorgaki v. Arec nâm zimmî meclis-i şer‘-i şerîf-i enverde her biri ikrâr ve takrîr-i kelâm edip meblağ-ı mezbûr beş yüz altmış guruşa bi’l-emr ve’l-kabûl her birimiz alâ-müddetin kefîl olduk dediklerinde mâ-hüve’l-vâki‘ bi’t-taleb ketb olundu. Fî 20 min-şehri Rebîʻülâhir sene 1121 Şuhûdü’l-hâl: Ebûbekir Beşe b. Mehmed, Ahmed Çelebi b. Hüseyin, İbrahim Çelebi Attâr, Ali Beşe Kömürcü, Mehmed Çelebi b. Abdullah, es-Seyyid Mustafa Çelebi b. Abdülkerim, es-Seyyid Mehmed Çelebi b. es-Seyyid Osman, es-Seyyid İbrahim Çelebi b. es-Seyyid Osman, Mehmed Çelebi b. İbrahim, Simad v. Haim, Yorgi v. Yani, Abraham v. Manoli, Hürmüz v. Yani, Samson v. Mıgırdıç, Serkiz v. Arakil.