Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 161 Hüküm no: 123 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Hacı İbrahim’in kocası Ömer Çelebi b. Süleyman’dan boşandığı Mahmiye-i İstanbul’da Mimâr Sinan Mahallesi’nde sâkine olup zâtı Ahmed Efendi b. Osman ve Hüseyin Beşe b. Osman nâm kimesneler ta‘rîfleriyle mu‘arrefe olan Fâtıma bt. el-Hâc İbrahim nâm hatun mahfil-i kazâda zevc-i dâhili işbu bâ‘isü’l-kitâb Ömer Çelebi b. Süleyman nâm kimesne mahzarında ikrâr ve takrîr-i kelâm edip zevcim mezbûr Ömer Çelebi zimmetinde mütekarrer ve ma‘kūdün-aleyh olan üç bin akçe mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Ömer Çelebi ile muhâla‘a-i sahîha-i şer‘iyye ile <> hul‘ olduğumda ol dahi hul‘-ı mezbûru kabûl eylediğinden sonra hukūk-ı zevciyete müte‘allika âmme-i da‘vâdan her birimiz âharın zimmetini ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 24 min-şehri Rebîʻülâhir sene 1121 Şuhûdü’l-hâl: Ahmed Efendi b. Receb, Ali Çelebi b. Eyüb, el-Hâc Halil b. Ahmed, Mustafa Beşe b. Ahmed, Veli b. Ahmed, Ali Çelebi b. Mehmed, Mustafa Beşe b. Ali, Mehmed b. Ahmed, Fazlı b. Hasan, Yusuf b. Ya‘kub ve gayruhum mine’l-huzzâr.