Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 161 Hüküm no: 124 Orijinal metin no: [17b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe b. Ahmed’in Hacı Mehmed b. Hüseyin’den satın aldığı kasap dükkanında kasaplık yapan Yanaki’yi istihdam etmemeyi taahhüt ettiği Mahmiye-i İstanbul’da Zeyrek kurbünde sâkin el-Hâc Mehmed b. Hüseyin nâm kimesne mahfil-i kazâda işbu râfi‘u’l-kitâb Ali Beşe b. Ahmed nâm kimesne mahzarında ikrâr ve takrîr-i kelâm edip mahmiye-i mezbûrede Aksaray kurbünde vâki‘ lede’l-ahâlî ve’l-cîrân ma‘lûmetü’l-hudûd Murad Paşa Mahallesi’nde kâin kasab dükkânımı mezbûr Ali Beşe’ye ahâlî-i mahalle iltimâslarıyla yedine verdiğim temessük nâtık olduğu üzere târih-i kitâb senesi Muharremi’l-harâmı gurresinden yevmî on birer akçeye olmak üzere beş sene tamamına değin îcâr ve teslîm ve otuz üç guruşunu ber-vech-i peşin ahz u kabz edip ol dahi ber-vech-i muharrer istîcâr ve kabûl eyledi dedikde gıbbe’t-tasdîkı’l-mer‘î Murad Paşa ahâlîsinden İmâm İbrahim Efendi b. Mehmed ve el-Hâc Hüseyin b. Mustafa ve Ali Çavuş b. Mehmed ve el-Hâc Hızır b. Ahmed ve Kasım Ağa b. Mehmed ve Süleyman b. Mahmud ve sâirleri mahfil-i kazâda takrîr-i kelâm edip mezbûr Ali Beşe’nin mukaddemâ hizmetinde olan Yanaki nâm zimmî eksik et satıp bize eziyet üzere olmağla baʻde’l-yevm mezbûr Yanaki Kasabı dükkân-ı mezbûrda istihdâm ettiğine ve dükkân-ı mezbûrda kasab olmasını istemeziz deyü merkūm Yanaki’nin sû’-i hâlini ihbâr etmeleriyle merkūm Ali Beşe min-ba‘d merkūm zimmîyi dükkân-ı mezbûrda istihdâm etmemeğe ta‘ahhüd etmeğin mâ-vaka‘a bi’t-taleb ketb olundu. Fî 24 min-şehri Rebîʻülâhir sene 1121 Şuhûdü’l-hâl: Abdullah Çelebi b. Osman, Süleyman b. Mahmud, Ahmed Çelebi b. Ali, el-Hâc İsmail b. Musa, el-Hâc Mehmed b. Süleyman, İbrahim Efendi el-İmâm, el-Hâc Hüseyin b. Mustafa.