Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 162 Hüküm no: 125 Orijinal metin no: [17b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şahbaz bt. Abdullah’ın damadı Abdi Beşe b. Mustafa ile olan menzil ve kürk davasında sulh yoluyla anlaştıkları Mahmiye-i İstanbul’da Defterdâr Ahmed Çelebi Mahallesi’nde sâkine zâtı Ali Çelebi b. Mustafa ve Mustafa b. Hasan ta‘rîfleriyle mu‘arrefe olan Şahbaz bt. Abdullah nâm hatun mahfil-i kazâda damadı işbu râfi‘u’l-vesîka Abdi Beşe b. Mustafa nâm kimesne mahzarında ikrâr ve takrîr-i kelâm edip icâreteyn-i ma‘lûmeteyn ile taht-ı tasarrufumda olup lede’l-ahâlî ve’l-cîrân ma‘lûmü’l-hudûd menzili târih-i kitâbdan dört sene mukaddem meccânen bâ-ma‘rifet-i mütevellî ile sana ferağ edip ve beynimizde ma‘lûm bir kürküm ile menzil-i mezkûr yedindedir deyü mezbûr Abdi Beşe’den da‘vâ sadedinde olduğumda beynimizde münâza‘ât-ı kesîre cereyân etmişidi el-hâletü hâzihî beynimize muslihûn tavassut edip da‘vâ-yı mezkûremden beni dâmadım mezbûr Abdi Beşe ile on guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr on guruşu dâmadım mezbûr Abdi Beşe yedinden ahz u kabz edip mârru’z--zikr menzil ve kürk da‘vâsından ve sâir beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan dâmadım mezbûr Abdi Beşe’nin zimmetini ibrâ-i âm ile ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 26 min-şehri Rebîʻülâhir sene 1121 Şuhûdü’l-hâl: Ali b. Mustafa, Mustafa b. Hasan, Molla Abdülkerim b. Osman, Osman Odabaşı b. Ahmed, Abdullah b. Mustafa, Süleyman b. Abdi, es-Seyyid Mehmed Efendi Kâtib, Mustafa b. Şa‘ban, Ali b. Bâli ve gayruhum mine’l-huzzâr.