Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 163 Hüküm no: 126 Orijinal metin no: [17b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meryem bt. Mehmed’in geçinemediği kocası Mustafa b. İvaz’dan boşandığı Mahmiye-i İstanbul’da Balaban Ağa Mahallesi’nde sâkine olup zâtı Hasan b. Abdullah ve Ali b. İvaz nâm kimesneler ta‘rîfleriyle mu‘arrefe olan Meryem bt. Mehmed nâm hatun mahfil-i kazâda işbu râfi‘u’l-kitâb Mustafa b. İvaz nâm kimesne mahzarında ikrâr ve takrîr-i kelâm edip mezbûr Mustafa zevcim olup beynimizde hüsn-i zindegānemiz olmamağla zimmetinde mütekarrer ve ma‘kūdün-aleyh olan bin altı yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerine ve meûnet-i süknâm dahi kendi üzerime olmak üzere zevcim mezbûr Mustafa ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru baʻde’l-kabûl hukūk-ı zevciyete ve sâir târih-i kitâba gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan her birimiz âharın zimmetini ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-şehri Rebî‘ilâhıre li-sene ihdâ ve işrîn ve miʼete ve elf. Şuhûdü’l-hâl: Mustafa Çelebi b. Şa‘ban, Hasan Çelebi b. Abdullah, Osman Çelebi b. Abdullah, Hasan Çelebi b. Mustafa, Ali Çelebi b. İvaz, Ali Çelebi b. Bâli.