Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 163 Hüküm no: 127 Orijinal metin no: [17b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Yusuf’un, Hadice bt. Abdullah’ın Vakfı’ndan satın aldıktan sonra ahaliden birkaç kişiye sattığı arsanın bedelini şahıslara geri ödeyip arsayı tekrar geri aldığı Mahmiye-i İstanbul’da Sofular Mahallesi sâkinelerinden Âişe bt. Yusuf nâm hatunun zevci ve tarafından husûs-ı âti’l-beyâna vekîl olduğu zât-ı mezkûreyi ma‘rifet-i şer‘iyye ile ârifân İmâm Hüseyin Efendi b. Kalender ve el-Hâc Mustafa Efendi b. Muslu şehâdetleriyle şer‘an sâbit olan el-Hâc Mustafa Ağa b. Mehmed nâm kimesne meclis-i şer‘-i şerîf-i enverde yine mahalle-i mezbûre sükkânından Mahmud b. Derviş Mehmed ve zevcesi Emine ve Derviş Mehmed ve Ali b. Hüseyin ve İbrahim b. Ali ve Âişe Hatun bt. Osman Ağa nâm kimesne[ler] muvâcehesinde bi’l-vekâle ikrâr ve takrîr-i kelâm edip ashâb-ı hayrâtdan merhûme Hadice bt. Abdullah nâm sâhibetü’l-hayrın vakfiye-i ma‘mûlün-bihâsında tasrîh olunduğu üzere süknâsı evlâdına ve evlâd-ı evlâdına ve evlâd-ı evlâd-ı evlâdına meşrûta vakfı ve mahalle-i mezkûrede vâki‘ bir tarafdan Başyazıcı bahçesi ve bir tarafdan Etmeydanı ve bir tarafdan vakf-ı mezkûrdan olan odalar ve bir tarafdan tarîk-i hâs ile mahdûd vakıf menzil bundan akdem vâki‘ olan harîkde muhterik oldukda vakf-ı mezkûra ber-mûceb-i şart-ı vâkıfe mütevelliye olan vâkıfe-i mezkûrenin oğlu Ali Çelebi’nin kızı işbu hâzıratü bi’l-meclis Râbia bt. Ali Çelebi nâm hatun diyâr-ı âharda bulunmağla kāimmakām-ı mütevelliye olan Hasan b. ( ) nâm kimesne arsa-yı mahdûde-i mezkûreyi müvekkilem mezbûre Âişe’ye yüz beş [18a] guruş icâre-i mu‘accele ve beher şehr müeccele-i ma‘lûme ile îcâr ve tefvîz ol dahi ber-vech-i meşrûh istîcâr ve kabûl ettiğinden sonra arsa-yı mezkûreden beş yüz zirâ‘ arsasını yüz yirmi üç guruş bedel mukābelesinde mezkûrûn Mahmud ve Emine ve Derviş Mehmed’e ferağ ve tefvîz onlar dahi tefevvüz ve kabûl ve mâlları ile arsa-yı mezkûre üzerine binâ ve yüz seksen zirâ‘ arsasını mezkûrân Ali ve İbrahim’e binâsıyla üç yüz yirmi beş guruş bedel mukābelesinde ferağ ve tefvîz onlar dahi tefevvüz ve kabûl ve yüz yetmiş zirâ‘ arsasını mezkûr Âişe bt. Osman Ağa’ya yüz guruş bedel mukābelesinde ferağ ve tefvîz ol dahi tefevvüz ve kabûl etmişidi el-hâletü hâzihî mezkûrûndan her biri ber-vech-i meşrûh tasarruflarında olan arsa-yı mezkûrenin ber-mûceb-i şart-ı vâkıfe süknâsı meşrûta olduğuna âlimler ve câzimler olmağla mezkûrûndan her biri ber-vech-i muharrer tasarruflarında olan arsadan ve binâdan ferağ ve kasr-ı yed etmeleriyle bedel olmak üzere müvekkilem mezkûreye medfû‘ları olan cem‘an beş yüz kırk sekiz guruşu müvekkilem mezkûre Âişe yedinden bi’t-tamam ve’l-kemâl ahz u kabz etmişlerdir hâlâ mezkûrûna suâl olunup takrîrleri tahrîr olunmak matlûbumdur dedikde gıbbe’s-suâl mezkûrûndan her biri cevâblarında kaziyye bâlâda tafsîl ve beyân ve şerh ve ıyân olunduğu vech üzere olup ber-vech-i mufassal arsa ve binâyı tefevvüz ve hâlâ ferağ ve kasr-ı yed ve bedel olmak üzere medfû‘ları olan cem‘an beş yüz kırk sekiz guruşu müvekkile-i mezkûre Âişe yedinden bi’t-tamam ve’l-kemâl ahz u kabz eylediklerini bi-tav‘ihim ikrâr u i‘tirâf etmeleriyle mâ-hüve’l-vâki‘ bi’t-taleb ketb olundu. Fî 13 min-Rebîʻülâhir sene 1121 Şuhûdü’l-hâl: İmâm Hüseyin Efendi b. Kalender, el-Hâc Mustafa Efendi b. Mustafa, Mustafa Beşe b. Abdullah, Hüseyin Çelebi b. Mahmud, Mehmed Efendi b. Ahmed, Mehmed Çelebi b. Mahmud, Süleyman Bey b. Abdullah, Halil Çelebi b. Mahmud, İpekçi Ömer Çelebi b. Halil, Ali Çelebi b. İvaz, Hüseyin Çelebi b. Hasan ve gayruhum mine’l-huzzâr.