Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 164 Hüküm no: 128 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mustafa’nın talebiyle boşandığı kocası Hacı İbrahim’in ödemesi şartıyla çocukları İsmihan ve Mehmed’e nafaka takdir edildiği Mahmiye-i İstanbul’da Topkapısı kurbünde Bayezid Ağa Mahallesi’nde sâkine zâtı ta‘rîf-i şer‘î ile mu‘arrefe olan işbu bâ‘isetü’l-kitâb Âişe bt. Mustafa nâm hatun meclis-i şer‘-i şerîf-i enverde takrîr-i kelâm ve tâʻbir ani’l-merâm edip zevc-i mutallakım gāib ani’l-meclis el-Hâc İbrahim’in firâşından hâsıl ve benden mütevellid hâlâ bi-hakkı’l-hıdâne hacr ve terbiyemde olan işbu sadrî sagīr oğlum Mehmed ve sadriye sagīre kızım İsmihan’ın nafaka ve kisveye eşedd-i ihtiyâclar olmağla kıbel-i şer‘-i enverden sagīrân-ı mezbûrân için babaları gāib-i mezbûr üzerine kadr-i ma‘rûf nafaka ve kisve-bahâ farz ve takdîr olunmak matlûbumdur dedikde hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri sagīrân-ı mezbûrânın nafaka ve kisvelerîçün babaları gāib-i mezbûr üzerine târih-i kitâbdan beher yevm her birine beşer akçeden cem‘an on akçe nafaka ve kisve-bahâ farz ve takdîr edip meblağ-ı mefrûz-ı mezbûru sagīrân-ı mezbûrânın nafaka ve kisve ve sâir levâzım-ı zarûriyyelerine harc u sarfa ve lede’l-iktizâ istidâne ve inde’z-zafer babaları mezbûr üzerine rücû‘a mezbûre Ayşe’ye izin vermeğin mâ-vaka‘a bi’t-taleb ketb olundu. Fi’l-yevmi’l-ışrîn min-şehri Rebîʻülâhir sene 1121 Şuhûdü’l-hâl: Fazlı Efendi el-Kâtib, es-Seyyid Mustafa Efendi Gabîrzâde? el-Muhzır, Hatîbzâde Mehmed Efendi b. Ahmed, Ali Efendi el-Kâtib, Kocavî Mustafa Efendi el-Muhzır, Muhzır Abdullah, Abdülkerim b. Ahmed, Hasan b. Abdullah, Ali b. Bâli, Mehmed b. Ahmed, Hüseyin b. Abdullah.