Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 165 Hüküm no: 129 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia Hanım bt. Abdullah’ın Huri bt. Abraham’a emanet olarak bıraktığı çeşitli eşyalarının iadesi yoksa bedelinin ödenmesi Mahmiye-i İstanbul’da Mahmudpaşa kurbünde sâkine Râbia Hanım bt. Abdullah’ın zevci ve tarafından husûs-ı âti’l-beyâna vekîl olduğu Mustafa Ağa b. es-Seyyid Ali ve Ali b. Mehmed şehâdetleriyle sâbit olan es-Seyyid Mustafa Ağa b. es-Seyyid Ali nâm kimesne mahfil-i kazâda Huri bt. Abraham nâm Nasrâniye muvâcehesinde bi’l-vekâle üzerine da‘vâ ve takrîr-i kelâm edip müvekkilem mezbûre Râbia Hanım bundan akdem kıymetleri beynlerinde ma‘lûme iki cevâhir sorguç ve bir incili âyine ve bir incili enselik ve bir incili serpûş ve bir sim leğen ma‘a ibrik ve bir sim şerbet ibriği ve bir sim buhûrdân ma‘a gülâbdân ve üç çift sırmalı yasdık ve bir sırmalı yüz yasdığı ve bir sırmalı boğça ve bir dikme ocak yaşmağı ve bir dikme seccâde ve bir sim şam‘dân ve bir sim mikrâzını merkūme Huri’ye bi-tarîkı’l-âriye def‘ ü teslîm ol dahi ahz u kabz etmekle suâl olunup mevcûde ise aʻyânını müstehleke ise ba‘de’s-sübût kıymet-i şer‘iyyelerini edâya merkūme Huri’ye tenbîh olunmak bi’l-vekâle matlûbumdur dedikde gıbbe’s-suâl merkūme Huri cevâbında eşyâ-i mezkûreyi müvekkile-i mezbûrenin emir ve izniyle âhara rehin vaz‘ etmek [üzere] kabz edip emri üzere âhara rehin vaz‘ eyledim deyü def‘le mukābele edicek isre’l-istintak ve’l-inkâr merkūme Huri’den sıdk-ı makāline beyyine taleb olundukda ityân-ı beyyineden izhâr-ı acz edip istihlâf etmeğin müvekkile-i mezbûre muhadderâtdan olmağla tahlîf için Mevlânâ Mehmed Efendi b. Mustafa irsâl olunup ol dahi mezbûrenin sâkine olduğu menzile varıp zeyl-i kitâbda muharrerü’l-esâmî Müslimîn huzûrunda fi’l-hakīka eşyâ-i mezbûreyi âhara rehin vaz‘ etmek üzere merkūme Huri’ye izin ve emr etmediğine mezbûre Râbia Hanım’a alâ-vechi’l-hasm yemîn teklîf eyledikde ol dahi alâ-vefkı’l-mesûl yemîn biʼllâhi te‘âlâ ettiğini mevlânâ-yı mezbûr mahallinde ve ba‘dehû ma‘an irsâl olunan Mehmed b. Abdullah ve Hüseyin Beşe b. Mehmed ile meclis-i şer‘a gelip alâ-vukū‘ihî inhâ ve takrîr etmeğin mûcebince eşyâ-i mezkûrenin mevcûde ise aʻyânını müstehleke ise ba‘de’s-sübût kıymet-i şer‘iyyelerini müvekkile-i mezbûreye edâya merkūme Huri’ye tenbîh-birle mâ-vaka‘a bi’t-taleb ketb olundu. Fî-muntasıfı Rebî‘ilâhıre sene 1121 Şuhûdü’l-hâl: el-Hâc Süleyman b. Mustafa, Abdülbâki b. Mehmed, el-Hâc Ahmed b. Halil, Molla İbrahim b. Mehmed, el-Hâc Mehmed Efendi b. Mehmed el-İmâm, Abdi Çelebi b. el-Hâc Receb, Ali b. Mehmed, Muhzır Hasan b. Hüseyin, Mehmed Çelebi b. ( ).