Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 166 Hüküm no: 130 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi İbrahim Çelebi b. Mustafa’nın evini Minkārîzâde Abdullah Efendi Vakfı’na sattığı Mahmiye-i İstanbul’da Koğacıdede Mahallesi’nde sâkin Derzi İbrahim Çelebi b. Mustafa nâm kimesne mahfil-i kazâda asrında Anadolu kazaskeri olup bundan akdem vedâ‘-ı âlem-i fânî eden merhûm Minkārîzâde Abdullah Efendi’nin vakfiye-i ma‘mûlün-bihâsında nukūdu akāra tebdîl şart eylediği vakfına kāimmakām-ı mütevellî ve vakf-ı şerîfin câbîsi olan işbu râfi‘u’l-kitâb Halil Çelebi b. Abdurrahman nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Kasab Ali Çelebi vakıf menzili ve bir tarafdan es-Seyyid İbrahim ve es-Seyyid Mustafa’nın müşterek mülk menzilleri ve iki tarafdan tarîk-i hâs ile mahdûd fevkānî bir bâb oda ve tahtânî bir bâb oda ve bir matbah ve bir sagīr kasr ve bir kenîf ve tahmînen iki yüz elli zirâ‘ zât-ı eşcâr-ı müsmire ve gayr-ı müsmireli bahçeyi müştemil mülk menzilimi cemî‘ tevâbi‘ ve levâhıkı ile tarafeynden îcâb ve kabûlü hâvî <> şürût-ı müfsideden ârî bey‘-i kat‘î ile mütevellî kāimmakāmı olan merkūm Halil Çelebi’ye vakfa akār olmak üzere yüz elli guruşa bey‘ ve teslîm mütevellî kāimmakāmı merkūm Halil Çelebi dahi vakfa akār olmak üzere iştirâ ve tesellüm ve kabz ettiğinden sonra semeni olan meblağ-ı mezbûr yüz elli guruşu mâl-ı vakf-ı mezbûrdan bana def‘ ü teslîm ben dahi yedinden tamamen ahz u kabz eyledim baʻde’l-yevm menzil-i mahdûd-ı mezkûr merkūm Halil Çelebi’nin kāimmakām-ı mütevellîsi olduğu vakf-ı mezbûr musakkafâtından olmuşdur vâkıf-ı mûmâ-ileyhin sâir akārâtını tasarruf eylediği gibi mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 24 min-şehri Rebîʻülâhir sene 1121 Şuhûdü’l-hâl: Yusuf Efendi b. Mehmed, Abdullah Efendi b. Mehmed, Abdullah Çelebi, Hâfız Mustafa Efendi, Ahmed Efendi b. Abdullah, Halil Efendi b. Turhan, es-Seyyid İbrahim Çelebi ve gayruhum mine’l-huzzâr.