Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 167 Hüküm no: 131 Orijinal metin no: [18b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Başyazıcı Ali Efendi b. Abdullah’ın alacaklısı olduğu Çukadâr Mehmed Beşe b. Abdülbâki ile sulh yoluyla anlaşarak birbirlerinin zimmetlerini ibra ettikleri Husûs-ı âti’z-zikrin mahallinde ketb ü tahrîri için savb-ı şer‘den Mevlânâ Ali Efendi b. Mustafa irsâl olunup ol dahi sâbıkā Başyazıcı olan fahrü’l-eşbâh Ali Efendi b. Abdullah nâm kimesnenin mahmiye-i İstanbul’da Hüsrev Paşa Türbesi kurbünde Kasab İvaz Mahallesi’nde vâki‘ menziline varıp zeyl-i rakīmde mektûbü’l-esâmî Müslimîn huzûrlarında akd-i meclis-i şer‘-i nebevî eyledikde merkūm Ali Efendi meclis-i ma‘kūd-ı mezbûrda işbu râfi‘u’l-kitâb Çukadâr Mehmed Beşe b. Abdülbâki mahzarında ikrâr ve takrîr-i kelâm edip mezbûr Mehmed Beşe’yi bundan akdem sâbıkā duhân gümrükcüsü olan gāib ani’l-meclis İbrahim Ağa zimmetinde olan bin yüz altmış altı guruşumu mezbûr İbrahim Ağa’dan ahz u kabza ve meblağ-ı mecmû‘-ı mezbûru beynimizde ma‘lûm kimesnelere deynim olmağla deyn-i mezbûrumu edâya tarafımdan vekîl ve nâib-i menâb nasb u ta‘yîn eylediğimde ol dahi ber-vech-i muharrer vekâlet-i mezbûreyi kabûl ve meblağ-ı mecmû‘-ı mezbûru merkūm İbrahim Ağa’dan bi’l-vekâle ahz u kabz ettiğinden sonra meblağ-ı mezbûrun sekiz yüz on altı guruşunu emrime binâen mahalline edâ edip bâkī üç yüz elli guruşunu kendi mesârifine sarfla istihlâk etmişidin deyü mezbûr Mehmed Beşe’den da‘vâ eylediğimde ol dahi meblağ-ı bâkī-i mezbûru emrinle işbu Ömer Çelebi b. el-Hâc Mehmed’e teslîm eyledim deyü def‘ edip beynimizde nizâ‘-ı küllî vukū‘undan sonra beynimize muslihûn tavassut edip da‘vâ-yı mezkûremden merkūm Mehmed Beşe benimle yüz guruş üzerine sulh olduğunda ben dahi sulh-i mezbûru baʻde’l-kabûl bedel-i sulh-i merkūm yüz guruşdan mâ‘adâ merkūm Mehmed Beşe ile da‘vâ ve nizâ‘ım kalmayıp husûs-ı mezbûra ve sâir beynimizde cereyân eden hesâb ve ahz u i‘tâ ve hukūk-ı ma‘lûme ve mechûleye müte‘allika âmme-i da‘vâdan târih-i kitâba gelince mezbûr Mehmed Beşe’nin zimmetini ibrâ-i âm ile ibrâ ve iskāt eyledim dedikde gıbbe’t-tasdîkı’l-vicâhî vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan İbrahim b. Mustafa ve Ali b. İvaz ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 24 min-şehri Rebîʻülâhir sene 1121 Şuhûdü’l-hâl: Es-Seyyid Abdülhalim Çelebi b. es-Seyyid Mustafa tâbi‘-i Ârif Efendi, Ahmed Efendi b. el-Hâc Abdullah, İbrahim Çelebi b. el-Hâc Mehmed, Ömer Çelebi b. el-Hâc Mehmed, Uzun Mehmed b. Abdullah, Abdullah Efendi b. Abdülbâki ve gayruhum mine’l-huzzâr.