Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 168 Hüküm no: 132 Orijinal metin no: [18b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa b. Ahmed’in Hayrünnisa Hatun Vakfı’na ait tasarrufundaki evin yeniden belirlenen icaresini ödemeyi kabul ettiği Husûs-ı âti’l-beyânın mahallinde ketb ü tahrîri için bi’l-iltimâs savb-ı şer‘-i enverden Mevlânâ İmâmzâde Mehmed Emin Efendi irsâl olunup ol dahi merhûme Hayrünnisa Hatun Vakfı’ndan mahmiye-i İstanbul’da Hoşkadem Mahallesi’nde vâki‘ bir tarafdan Mustafa Efendi mülkü ve bir tarafdan vakf-ı mezbûrdan ( ) tasarrufunda olan menzil ve bir tarafdan yine vakf-ı mezbûrun tarîk-i hâssı ve bir tarafdan tarîk-i âm ile mahdûd olup Osman Ağa b. Ahmed’in tasarrufunda olan menzile varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde mezbûr Osman Ağa meclis-i ma‘kūd-ı mezbûrda vakf-ı mezbûrun kāimmakām-ı mütevellîsi olan işbu râfi‘u’l-kitâb Ali Efendi b. Ahmed mahzarında ikrâr ve takrîr-i kelâm edip işbu menzil-i mezbûr ve yine vakf-ı mezbûr musakkafâtından işbu müşâhede olunan sâir menâzil bundan akdem bi-emri’llâhi te‘âlâ muhterik oldukda beher mâh yirmi beşer akçe ücret-i müeccele ile îcâr ve masrûfları icâre-i mu‘accelesine mahsûb olmak üzere binâya izin ve taraf-ı vakıfdan temessük verilip hâlâ mütevellî-i mezbûr Ali Efendi benim tasarrufumda olan menzil için sâir menâzilden arsası altmış zirâ‘ ziyâde ve ücret-i müeccelesi defter-i vakıfda otuz yedi buçuk akçe kaydolunmuşdur deyü beher mâh otuz yedişer buçuk akçe da‘vâ edip ve mi‘mâr-ı hâssa halîfelerinden işbu hâzırân bi’l-meclis Hasan Halîfe b. Mahmud ve es-Seyyid Şa‘ban Halîfe b. Mahmud mesâhası üzere Ümmügülsüm Hatun ve Osman Ağa tasarruflarında olup beher mâh yirmi akçe ücret-i müeccelesi olan işbu menziller yüz dörder zirâ‘ olup ve işbu benim tasarrufumda olan menzilin arsası dahi yüz altmış zirâ‘ olup ol takdîrce benim menzilimin arsası müdde‘î-i mütevellî-i mezbûrun vech-i [19a] meşrûh üzere sâirlerinden altmış zirâ‘ ziyâde olduğu müte‘ayyin olmağın baʻde’l-yevm beher mâh otuz yedişer buçuk akçe ücret-i müeccele ile kabûl ve meblağ-ı mezbûr otuz yedi buçuk akçeyi beher mâh taraf-ı vakfa edâ ve îfâya ben müte‘ahhid olup ve mütevellî-i mezbûr dahi müceddeden temessük tahrîr ve yedime teslîm edip kat‘-ı nizâ‘ eyledik dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan el-Hâc Mehmed b. ( ) ve Abdullah b. Abdullah ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 18 min-şehri Rebîʻülâhir sene 1121 Şuhûdü’l-hâl: Osman Bey b. Mahmud, Mehmed Ağa b. Osman, Ali Efendi b. Osman, Abdullah Efendi b. Mehmed, Monla Ahmed b. Ali, es-Seyyid Mehmed Çelebi b. Ali, Ahmed Çelebi b. Ahmed, Halil Beşe b. Ömer ve gayruhum mine’l-huzzâr.