Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 169 Hüküm no: 133 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. Abdullah’ın evini Hüseyin Beşe b. Mehmed’e sattığı Mahmiye-i İstanbul’da Abdi Subaşı Mahallesi sükkânından Ali Ağa b. Abdullah nâm kimesne meclis-i şer‘-i şerîf-i enverde işbu râfi‘u’l-kitâb Hüseyin Beşe b. Mehmed nâm kimesne mahzarında ikrâr ve takrîr-i kelâm edip merhûm Sinan Paşa Vakfı’na senede kırk beş akçe mukāta‘ası olup kasaba-i Kasımpaşa mahallâtından Kurd Çelebi Mahallesi’nde vâki‘ bir tarafdan mîrî debbâğhâne ve baʻzan Sinan Paşa Debbâğhânesi ve iki tarafdan yine Sinan Paşa Vakfı’ndan olan odalar ve bir tarafdan tarîk-i hâs ile mahdûd ve mümtâz bir bâb tahtânî odayı müştemil menzilimi tarafeynden îcâb ve kabûlü hâvî bey‘-i bâtt-ı sahîh-i şer‘î ile bi-cümleti’t-tevâbi‘ ve’l-levâhık merkūm Hüseyin Beşe’ye yetmiş guruşa bey‘ ve teslîm ol dahi vech-i muharrer üzere iştirâ ve tesellüm ve kabz ve kabûl eylediğinden sonra semeni olan meblağ-ı merkūm yetmiş guruşu merkūm Hüseyin Beşe yedinden tamamen ahz u kabz eyledim baʻde’l-yevm menzil-i merkūmda alâkam kalmayıp merkūm Hüseyin Beşe’nin hakk-ı mahzı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 27 min-şehri Rebîʻülâhir sene 1121 Şuhûdü’l-hâl: Hüseyin Çelebi b. Mustafa Çelebi, Mustafa Çelebi b. Şa‘ban, Ali Çelebi b. İvaz, Hasan Çelebi b. Mustafa ve gayruhum mine’l-huzzâr.