Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 170 Hüküm no: 135 Orijinal metin no: [19a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veli Çavuş b. Bayram’ın Yahya Çelebi Vakfı’ndan aldığı borçtan vakfın mütevellîsi İsmail Efendi b. Derviş Efendi’nin haksız yere parasını aldığı iddiasıyla açtığı davadan vazgeçtiği Dergâh-ı âlî dâme mahfûfen bi’l-me‘âlî yeniçerileri çavuşlarından olup mahmiye-i İstanbul’da Dülgeroğlu Mahallesi’nde sâkin Veli Çavuş b. Bayram nâm kimesne mahfil-i kazâda merhûm Yahya Çelebi Vakfı’na bi’l-fi‘il mütevellî olan işbu râfi‘u’l-kitâb fahrü’l-müderrisîni’l-kirâm İsmail Efendi b. Derviş Efendi mahzarında ikrâr ve takrîr-i kelâm edip bundan akdem vakf-ı mezbûr mâlından bana idâne ve teslîm eylediği ma‘lûmü’l-mikdâr akçe için benden kalemiye nâmına bi-gayr-ı hakkın elli guruş ahz eylemişdir deyü mûmâ-ileyh İsmail Efendi’den da‘vâya tasaddî eylediğimde beynimizde münâza‘ât-ı kesîre ve muhâsamât-ı ekîde cereyân etmişidi el-hâletü hâzihî ben da‘vâ-yı mezkûremden fâriğ olup târih-i kitâba gelince âmme-i de‘âvî ve mutâlebât ve eymân ve muhâsamâtdan mûmâ-ileyh İsmail Efendi’nin zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-şehri Rebîʻülâhir sene 1121 Şuhûdü’l-hâl: Zâ‘im Mehmed Ağa b. Tayfur, İmâm Mehmed Efendi b. Mustafa, İbrahim Çelebi b. Tayfur, es-Seyyid Mustafa Efendi b. Abdülkerim, Salih Çelebi b. Mustafa, Molla İbrahim b. Abdurrahman.