Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 170 Hüküm no: 136 Orijinal metin no: [19a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mardiros v. Kirkor v. Mercan’ın evini istiğlal yoluyla Saime Hatun Vakfı adına mütevellîsi Müderris İsmail Efendi b. Derviş Efendi’ye sattığı Mahmiye-i İstanbul’da Tülbentçi Hüsam Mahallesi’nde sâkine Mardiros v. Kirkor v. Mercan nâm zimmî mahfil-i kazâda merhûme Saime Hatun Vakfı’na bi’l-fi‘il mütevellî olan işbu râfi‘u’l-kitâb umdetü’l-müderrisîni’l-kirâm İsmail Efendi b. Derviş Efendi mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Ermiye nâm zimmî menzili ve bir tarafdan Enserci Ayan zimmî menzili ve bir tarafdan çeşme ve bir tarafdan tarîk-i âm ile mahdûd ma‘lûmü’l-müştemilât büyût-ı adîdeyi muhtevî mülk menzilimi mütevellî-i mûmâ-ileyhe bi-tarîkı’l-istiğlâl yüz seksen dört guruşa bey‘ ve teslîm ol dahi ber-vech-i muharrer iştirâ ve tesellüm ve kabûl edip semeni olan meblağ-ı mezbûr yüz seksen dört guruşu mâl-ı vakf-ı mezbûrdan olmak üzere mütevellî-i mûmâ-ileyh yedinden tamamen ahz u kabz eylediğimden sonra mütevellî-i mûmâ-ileyh menzil-i mahdûd-ı mezkûru gıbbe’t-tahliyyeti’ş-şer‘iyye ve’t-tekābuzi’l-mer‘î târih-i kitâb senesi şehr-i Muharremi’l-harâmı gurresinden bir sene tamamına değin yirmi yedi guruşa bana îcâr ve teslîm ben dahi istîcâr ve tesellüm ve kabûl eyledim dedikde gıbbe’t-tasdîkı’l-mer‘î yine mezbûr Mardiros meclis-i mezkûrda İbrahim Çelebi b. Tayfur mahzarında ikrâr ve takrîr-i kelâm edip menzil-i mezbûr hakīkatde rehin ve meblağ-ı mezbûr zimmetimde deyn olmağla müddet-i mezkûre tamamında asl-ı mâl-ı mezbûr ile ücret-i mezkûreyi edâdan âciz olur isem menzil-i mezbûru semen-i misli ile âhara bey‘ ve kabz-ı semene ve semen-i mezkûrdan deyn-i mezbûru edâya vekâlet-i devriye ile tarafımdan mezbûr İbrahim Çelebi’yi vekîl ve nâib-i menâb nasb u ta‘yîn eylediğimde ol dahi vekâlet-i mezbûreyi kabûl ve merâsimini edâya ta‘ahhüd eyledi dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 28 min-şehri Rebîʻülâhir sene 1121 Şuhûdü’l-hâl: Salih Çelebi b. Mustafa, Za‘îm Mehmed Ağa b. Tayfur, Ali Efendi b. Abdullah, Mustafa Çelebi b. Ömer, Müezzin Mehmed Efendi b. Yusuf, Monla İbrahim b. Abdurrahman, Kâtib Ali Efendi, Çukadâr Ali Beşe, İmâm Mehmed Efendi b. Mustafa ve gayruhum mine’l-huzzâr.