Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 171 Hüküm no: 137 Orijinal metin no: [19a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bağdasar v. Karabet’in evini istiğlal yoluyla Saime Hatun Vakfı adına mütevellîsi Müderris İsmail Efendi b. Derviş Efendi’ye sattığı Mahmiye-i İstanbul’da Sancakdâr Hayreddin Mahallesi’nde sâkin Bağdasar v. Karabet nâm zimmî mahfil-i kazâda merhûme Saime Hatun Vakfı’na bi’l-fi‘il mütevellî olan işbu râfi‘u’l-kitâb umdetü’l-müderrisîni’l-kirâm İsmail Efendi b. Derviş nâm kimesne mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Medîne-i münevvere Vakfı olan menzil ve bir tarafdan Begos nâm zimmî menzili ve bir tarafdan Papa Hristos nâm zimmî menzili ve bir tarafdan tarîk-i âm ile mahdûd büyût-ı adîdeyi müştemil mülk menzilimi mütevellî-i mûmâ-ileyhe bi-tarîkı’l-istiğlâl [19b] iki yüz guruşa bey‘ ve teslîm ol dahi ber-vech-i muharrer mâl-ı vakf-ı mezbûr ile iştirâ ve tesellüm ve kabûl edip semeni olan meblağ-ı mezbûr iki yüz guruşu mütevellî-i mûmâ-ileyh yedinden tamamen ahz u kabz eylediğimden sonra mütevellî-i mûmâ-ileyh menzil-i mahdûd-ı mezkûru gıbbe’t-tahliyyeti’ş-şer‘iyye ve’t-tekābuzi’l-mer‘î târih-i kitâb senesi şehr-i Muharremi’l-harâmı gurresinden bir sene tamamına değin bana otuz guruşa îcâr ve teslîm ben dahi istîcâr ve tesellüm ve kabûl eyledim dedikde gıbbe’t-tasdîkı’ş-şer‘î asl-ı mâl-ı mezkûr ile ücret-i mezkûreye tarafeynden emir ve kabûlü hâvî kefâlet-i sahîha-i şer‘iyye ile mezbûr Bağdasar’ın sulbî oğlu Kirkor nâm zimmî kefîl oldukdan sonra merkūm Bağdasar meclis-i mezkûrda İbrahim Çelebi b. Tayfur mahzarında ikrâr ve takrîr-i kelâm edip menzil-i mezbûr hakīkatde rehin ve meblağ-ı mezbûr zimmetimde deyn olmağla müddet-i mezkûre tamamında asl-ı mâl-ı mezbûr ile ücret-i merkūmeyi edâdan âciz olur isem menzil-i mezkûru semen-i misli ile âhara bey‘ ve kabz-ı semene ve semen-i mezbûrdan deyn-i mezkûru edâya akd-i rehnde meşrûta vekâlet-i devriye ile tarafımdan mezbûr İbrahim Çelebi’yi vekîl ve nâib-i menâb nasb u ta‘yîn eylediğimde ol dahi vekâlet-i mezbûreyi kabûl ve merâsimini edâya ta‘ahhüd eyledi dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 18 min-şehri Rebîʻülâhir sene 1121 Şuhûdü’l-hâl: Es-sâbikūn, es-sâbikūn, es-sâbikūn.