Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 172 Hüküm no: 138 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dergâh-ı âlî yeniçerileri ocağının orta çavuşları Ahmed Ağa b. Mustafa’nın evini istiğlal yoluyla Yahya Efendi Vakfı adına mütevellîsi Müderris İsmail Efendi b. Derviş Efendi’ye sattığı Dergâh-ı âlî dâme mahfûfen bi’l-me‘âlî yeniçerileri ocağının orta çavuşları olan fahrü’l-akrân Ahmed Ağa b. Mustafa tarafından husûs-ı âti’l-beyânı ikrâra vekîl olduğu Mehmed Efendi b. Mustafa ve Mehmed Ağa b. Tayfur nâm kimesneler şehâdetleriyle şer‘an sâbit olan Mehmed Çorbacı b. Süleyman nâm kimesne mahfil-i kazâda merhûm Yahya Çelebi Vakfı’na bi’l-fi‘il mütevellî olan işbu râfi‘u’l-kitâb umdetü’l-müderrisîni’l-kirâm İsmail Efendi b. Derviş Efendi mahzarında bi’l-vekâle ikrâr ve takrîr-i kelâm edip mahmiye-i İstanbul’da Sarı Nasuh Mahallesi’nde vâki‘ bir tarafdan Abbas Efendi mülkü ve iki tarafdan Mustafa Çelebi menzili ve bir tarafdan tarîk-i âm ile mahdûd ma‘lûmü’l-müştemilât büyût-ı adîdeyi muhtevî mülk menzilini bi-tarîkı’l-istiğlâl mütevellî-i mûmâ-ileyhe beş yüz yirmi guruşa bey‘ ve teslîm ol dahi ber-vech-i muharrer mâl-ı vakf-ı mezbûr ile iştirâ ve tesellüm ve kabûl eylediğinden sonra semeni olan meblağ-ı mezbûr beş yüz yirmi guruşu mütevellî-i mûmâ-ileyh yedinden tamamen ahz u kabz eylediğinden sonra mütevellî-i mûmâ-ileyh menzil-i mezkûru gıbbe’t-tahliyyeti’ş-şer‘iyye ve’t-tekābuzi’l-mer‘î târih-i kitâb senesi <> gurre-i Rebî‘ülâhir’inden bir sene tamamına değin müvekkilim mezbûra yetmiş sekiz guruşa îcâr ve teslîm edip müvekkilim mezbûr dahi istîcâr eyledi dedikde gıbbe’t-tasdîkı’l-mer‘î asl-ı mâl-ı vakf-ı mezbûr beş yüz yirmi guruş ile ücret-i merkūm yetmiş sekiz guruş ki cem‘an beş yüz doksan sekiz guruşa emir ve kabûlü hâviye kefâlet-i sahîha-i şer‘iyye ile Mehmed Çavuş b. Mustafa kefîl oldukdan sonra vekîl-i merkūm meclis-i mezkûrda i‘âde-i kelâm edip müvekkil-i merkūm asl-ı mâl-ı mezkûr ile ücret-i mezbûreyi müddet-i madrûbe tamamında edâdan âciz olur ise menzil-i mezbûru baʻde’l-müzâyede semen-i misli ile âhara bey‘ ve kabz-ı semene ve semeninden deyn-i mezkûru edâya akd-i rehnde meşrûta vekâlet-i devriye ile tarafından İbrahim Çelebi b. Tayfur’u vekîl ve nâib-i menâb nasb u ta‘yîn eyledikde ol dahi vekâlet-i mezbûreyi kabûl ve merâsimini kemâ-yenbagī edâya ta‘ahhüd eyledi dedikde mâ-vaka‘a bi’t-taleb ketb olundu. Fî 26 min-şehri Rebîʻülâhir sene 1121 Şuhûdü’l-hâl: Eş-şâhidûnü’s-sâbıkūn, es-sâbikūnü’ş-şâhidûn, eş-şâhidûnü’s-sâbıkūn ve gayruhum mine’l-huzzâr.