Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 173 Hüküm no: 139 Orijinal metin no: [19b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veli Çavuş b. Bayram’ın Dülgeroğlu Mahallesi’ndeki evini istiğlal yoluyla Yahya Efendi Vakfı adına mütevellisi Müderris İsmail Efendi b. Derviş Efendi’ye sattığı Mahmiye-i İstanbul’da Dülgeroğlu Mahallesi’nde sâkin Veli Çavuş b. Bayram nâm kimesne mahfil-i kazâda merhûm Yahya Çelebi Vakfı’na bi’l-fi‘il mütevellî olan işbu râfi‘u’l-kitâb fahrü’l-müderrisîni’l-kirâm İsmail Efendi b. Derviş Efendi mahzarında ikrâr ve takrîr-i kelâm edip mahalle-i mezbûrede vâki‘ etrâf-ı erba‘ası yine benim âhar mülküm ile mahdûd fevkānî üç bâb kârgîr oda ve tahtânî üç bâb kârgîr oda ve bir kârgîr matbah ve bir hamam ve bir câmekân ve bir ahır ve zîr-i zemîn ve su kuyusunu muhtevî mülk menzil ile <> menzil-i mezbûra muttasıl iki bâb menzilimi mütevellî-i mûmâ-ileyhe dört yüz guruşa bi-tarîkı’l-istiğlâl bey‘ eylediğimde ol dahi ber-vech-i muharrer mâl-ı vakf-ı mezbûr ile iştirâ ve tesellüm ve kabûl eylediğinden sonra semeni olan meblağ-ı mezbûr dört yüz guruşu mütevellî-i mezbûr yedinden tamamen ahz u kabz eylediğimden sonra mütevellî-i mûmâ-ileyh menzil-i mahdûd-ı mezkûru gıbbe’t-tahliyyeti’ş-şer‘î ve’t-tekābuzi’l-mer‘î târih-i kitâb senesi şehr-i Muharremi’l-harâm gurresinden yine bana altmış guruşa îcâr ve teslîm ben dahi istîcâr ve tesellüm ve kabz u kabûl eyledim dedikde gıbbe’t-tasdîkı’ş-şer‘î mezbûr Veli Çavuş meclis-i mezkûrda İbrahim Çelebi b. Tayfur mahzarında ikrâr ve takrîr-i kelâm edip menzil-i mezbûr hakīkatde rehin ve meblağ-ı mezbûr zimmetimde deyn olmağla menzil-i mezbûru semen-i misli ile âhara bey‘ ve semeninden deyn-i mezkûru edâya akd-i rehinde meşrûta vekâlet-i devriye ile tarafımdan mezbûr İbrahim Çelebi’yi vekîl ve nâib-i menâb nasb u ta‘yîn eylediğimde ol dahi vekâlet-i mezbûreyi kabûl ve merâsimini edâya ta‘ahhüd ve iltizâm eyledi dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 29 min-şehri Rebîʻülâhir sene 1121 Şuhûdü’l-hâl: Eş-şâhidûnü’s-sâbıkūn, es-sâbikūn, es-sâbikūn ve gayruhum mine’l-huzzâr.