Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 174 Hüküm no: 141 Orijinal metin no: [19b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Râbia Hatun bt. Seyyid Mehmed’in beslemesi olan Raziye bt. Mehmed’in velisi olmadığından bizzat mahkemeye başvurusuyla Hasan b. Mustafa ile nikahlandığı Mahmiye-i İstanbul’da Dâye Hatun Mahallesi’nde sâkine Şerife Râbia Hatun bt. es-Seyyid Mehmed’in hacr u terbiyesinde olup sin ve cüssesinin bülûğa tahammülü ve bülûğunu mu‘terife olan Raziye bt. Mehmed’in velîsi olmadığı lede’ş-şer‘ zâhir ve mütebeyyin olmağın mezbûre Raziye meclis-i şer‘-i şerîf-i enverde işbu râfi‘u’l-vesîka Hasan b. Mustafa nâm kimesne mahzarında ikrâr ve takrîr edip hâkim-i muvakki‘-ı sadr-ı kitâb [20a] tûbâ-lehû ve hüsnü-meâb hazretleri izniyle nefsimi mezbûr Hasan’a üç bin akçe mehr-i müeccel ve beynimizde ma‘lûm iki yorgan ve bir döşek ve bir minder ve iki yasdık ve bir tencere ve iki sahan ve bir tâbe ve bir şam‘dân ve bir leğen ma‘a ibrik ve bir çuka ferâce ve bir kahve ibriği ve bir kebe ve bir yan keçesi ve bir sini ve sim kuşak mu‘accel olmak üzere işbu meclisde şuhûd mahzarında tezvîc ve inkâh eylediğimde ol dahi ber-vech-i muharrer tezevvüc ve istinkâh ve kabûl eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 26 min-şehri Rebîʻülâhir sene 1121 Şuhûdü’l-hâl: Es-sâbikūn, es-sâbikūn, es-sâbikūn ve gayruhum mine’l-huzzâr.