Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 175 Hüküm no: 142 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa oğlu Mehmed ve Ali kardeşlerin Küre kazasının Çilelik köyündeki tarlalarını İbrahim Beşe b. Mehmed’e sattıkları Vilâyet-i Anadolu’da Küretünnuhâs kazâsına tâbi‘ Çilelik nâm karye sükkânından olup mahmiye-i İstanbul’da müsâferet vechi üzere sâkin Mehmed ve Ali ibney Mustafa nâm kimesneler mahfil-i kazâda işbu râfi‘u’l-kitâb İbrahim Beşe b. Mehmed nâm kimesne mahzarında her biri ikrâr ve takrîr-i kelâm edip karye-i mezbûre toprağında vâki‘ bir tarafdan Mustafa Bey tarlası ve iki tarafdan mezbûr İbrahim tarlaları ve bir tarafdan tarîk-i âm ile mahdûd tahmînen iki keyl tohum istî‘âb eder tarlamızı bâ-ma‘rifet-i sâhib-i arz mezbûr İbrahim Beşe’ye yirmi bir guruş bedel mukābelesinde ferağ ve tefvîz ol dahi tefevvüz ve kabûl eylediğinden sonra bedel-i merkūm yirmi bir guruşu mezbûr İbrahim yedinden tamamen ahz u kabz eyledik baʻde’l-yevm sâlifü’z-zikr tarla mezbûr İbrahim Beşe[nin] hakk-ı müfevvazı olup bizim alâkamız kalmadı dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 min-şehri Rebîʻülâhir sene 1121 Şuhûdü’l-hâl: Mustafa b. Ebûbekir, el-Hâc Mehmed b. Müstecâb, Mustafa b. Şa‘ban, Ahmed Beşe b. Muslu, Muslu Beşe b. Mehmed, Mehmed Beşe b. İyâd ve gayruhum mine’l-huzzâr.