Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 175 Hüküm no: 143 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Mehmed’in Müftü Ali Çelebi Mahallesi’ndeki sabunhane arsasını eski kocası Humbaracıbaşı Mehmed Ağa b. Abdullah b. Abdurrahman’a sattığı Fi’l-asl vilâyet-i Rumeli’nde Zağra-i Atîk mahallâtından Câmi‘-i Atîk Mahallesi ahâlîsinden olup mahmiye-i İstanbul’da Müftî Ali Çelebi Mahallesi’nde sâkine Âişe bt. Mehmed b. Mehmed nâm hatun tarafından husûs-ı âti’l-beyânı ikrâra vekîl olduğu zât-ı mezbûreyi ma‘rifet-i şer‘iyye ile ârifân el-Hâc Abdullah Efendi b. el-Hâc Hasan ve Hüseyin Çelebi b. Mahmud nâm kimesneler şehâdetleriyle şer‘an sâbit olan Mehmed Çelebi b. Mehmed nâm kimesne mahfil-i kazâda müvekkile-i mezbûrenin zevc-i sâbıkı işbu râfi‘u’l-kitâb Humbaracıbaşı Mehmed Ağa b. Abdullah b. Abdurrahman tarafından husûs-ı âti’l-beyânı tasdîka ol dahi bi-mâ-hüve nehci’s-sübût şer‘an sâbit olan el-Hâc İsmail Efendi b. Musa nâm kimesne mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkilem mezbûrenin yedinde mülk ve hakkı olup mahalle-i mezbûrede vâki‘ üç tarafdan zevc-i sâbıkı müşteri-i mezbûr mülkü ve bir tarafdan tarîk-i âm ile mahdûd mülk sabunhâne arsasını cemî‘ müştemilâtıyla tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile zevc-i sâbıkı müvekkil-i mezbûr Mehmed Ağa’ya otuz guruşa bey‘ ve temlîk eylediğinde ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr otuz guruşu zevc-i sâbıkı müvekkil-i mezbûr yedinden tamamen ahz u kabz eyledi baʻde’l-yevm zikri mürûr eden arsa-yı mahdûde-i mezkûre cemî‘ müştemilâtıyla zevci mezbûr Mehmed Ağa’nın mülk-i müşterâsı ve hakk-ı sırfı olup mahallinde zabt u tasarrufa zevc-i sâbıkı mezbûr Mehmed Ağa’yı taslît eyledi keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 29 min-şehri Rebîʻülâhir sene 1121 Şuhûdü’l-hâl: el-Hâc Ahmed Efendi b. el-Hâc Mehmed Efendi, Za‘îm Mustafa Ağa b. Handan, Za‘îm Handan Ağa b. Mustafa, Mustafa b. Şa‘ban ve gayruhum mine’l-huzzâr.