Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 176 Hüküm no: 144 Orijinal metin no: [20a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani Hatun bt. Abdullah’ın kocası Yusuf b. Abdullah’dan boşandığı Mahmiye-i İstanbul’da Cebecibaşı Mahallesi’nde sâkine olup zâtı ta‘rîf-i şer‘î ile mu‘arrefe olan Ümmühani bt. Abdullah nâm hatun meclis-i şer‘-i şerîf-i enverde zevc-i dâhili işbu râfi‘u’l-kitâb Yusuf b. Abdullah nâm kimesne mahzarında ikrâr ve takrîr-i kelâm edip bundan akdem zevcim mezbûr Yusuf eşyâ-i memlûkesinden altı yüz akçe kıymetli bir köhne kebe ve bir köhne yeşil dolamamı bana bey‘ ve teslîm ben dahi yedinden iştirâ ve tesellüm eylediğimden sonra zimmetinde mütekarrer ve ma‘kūdün-aleyh iki bin akçe mehr-i müeccelimin ol mikdârına takās eylediğinde ben dahi mukāssa ve kabûl edip bâkī zimmetinde bin dört yüz akçe mehrim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iyye ile muhâla‘a eylediğimde ol dahi ber-vech-i muharrer hul‘-ı mezbûru kabûl eylediğinden sonra hukūk-ı zevciyete müte‘allika âmme-i da‘vâdan her birimiz âharın zimmetini ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 min-şehri Rebîʻülâhir sene 1121 Şuhûdü’l-hâl: Mustafa b. Şa‘ban, Ali b. İvaz, Süleyman el-Muhzır, Hasan b. Abdullah, Abdullah b. Abdullah ve gayruhum mine’l-huzzâr.