Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 176 Hüküm no: 145 Orijinal metin no: [20a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. David v. Yakob’un arsasını Resul b. Osman’a sattığı Mahmiye-i İstanbul’da Hasan Halîfe Mahallesi sükkânından David v. Yakob nâm zimmî meclis-i şer‘-i şerîf-i enverde işbu bâ‘isü’l-kitâb Resul b. Osman nâm kimesne mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ etrâf-ı selâsesi benim âhar mülküm ve taraf-ı râbi‘i tarîk-i hâs ile mahdûd tûlen ve arzen bi-hesâb-ı terbî‘î seksen zirâ‘ iki tarafı taş duvar mülk menzil arsamı tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile nakd seksen guruşa mezbûr Resul’e bey‘ ve teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz u kabûl eylediğinden sonra semeni olan meblağ-ı mezbûr seksen guruşu mezbûr Resul yedinden tamamen ahz u kabz eyledim baʻde’l-yevm zikri mürûr eden menzil arsası mezbûr Resul’ün mülk-i müşterâsı ve hakk-ı sırfı olmuşdur benim kat‘â alâka ve medhalim yokdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 min-şehri Rebîʻülâhir sene 1121 Şuhûdü’l-hâl: Mustafa b. Ali, Mehmed b. Ali, Mustafa b. Hüseyin, Hüseyin b. Receb, el-Hâc İbrahim b. Hayrullah, Ali Çelebi b. İvaz, Mustafa Çelebi b. Şa‘ban Galatalı, Süleyman b. Abdullah Muhzır, Ali Beşe b. Bâli, Abdullah b. Abdullah, Ali Beşe b. İvaz, Ahmed b. Mehmed ve gayruhum mine’l-huzzâr.