Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 177 Hüküm no: 146 Orijinal metin no: [20a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. David v. Yakob’un arsasını Hacı İbrahim b. Hayreddin’e sattığı Mahmiye-i İstanbul’da Hasan Halîfe Mahallesi sükkânından David v. Yakob nâm zimmî meclis-i şer‘-i şerîfde işbu bâ‘isü’l-kitâb el-Hâc İbrahim b. Hayrullah mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ iki tarafdan kendi âhar mülküm ve bir tarafı Resul mülkü ve bir tarafı tarîk-i hâs ile mahdûd tûlen ve arzen bi-hesâb-ı terbî‘î seksen zirâ‘ iki tarafı taş duvar mülk menzil arsamı tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile nakd seksen guruşa mezbûr Hacı İbrahim’e bey‘ ve teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz u kabûl eylediğinden sonra semeni olan meblağ-ı mezbûr seksen guruşu mezbûr Hacı İbrahim yedinden tamamen ahz u kabz eyledim fîmâ-ba‘d zikri mürûr eden menzil arsası cemî‘ müştemilâtıyla mezbûr Hacı İbrahim’in mülk-i müşterâsı ve hakk-ı sırfı olmuşdur benim kat‘â alâka ve medhalim yokdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 min-şehri Rebîʻülâhir sene 1121 Şuhûdü’l-hâl: Es-sâbikūn, es-sâbikūn, es-sâbikūn, es-sâbikūn ve gayruhum mine’l-huzzâr.