Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 177 Hüküm no: 147 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaspar v. Kirkor’un Davudpaşa Mahallesi’nde Mustafa b. Bayram’dan satın aldığı evin satışını iptal edip almaktan vazgeçtiği Mahmiye-i İstanbul’da ( ) Mahallesi’nde sâkin Kaspar v. Kirkor nâm zimmî mahfil-i kazâda mahmiye-i mezbûrede Koca Mustafa Paşa Câmi‘-i şerîfi kurbünde Hâcehatun Mahallesi ahâlîsinden işbu râfi‘u’l-kitâb Abdullah Ağa b. Mehmed mahzarında ikrâr ve takrîr-i kelâm edip ben bundan akdem mârru’z--zikr Hâcehatun Mahallesi’nde vâki‘ bir tarafdan Mustafa Çelebi mülkü ve bir tarafdan baʻzan merhûm Ahmed Efendi mülkü ve baʻzan Odabaşı menzili ve bir tarafdan baʻzan Taşcı Asvader ve baʻzan Melkon mülkleri ve bir tarafdan tarîk-i âm ile mahdûd mülk menzil kadîmden Müslümân menzili olup âhara bey‘ olundukda taklîl-i cemâ‘ate bâ‘is olur deyü mahmiye-i mezbûrede hâlâ seccâde-nişîn-i şerî‘at-i garrâ olan sa‘âdetlü semâhatlü efendi hazretleri i‘lâm ve mûcebince ehl-i İslâm’a bey‘ oluna deyü fermân-ı âlî sâdır olmağın imtisâlen li’l-emri’l-âlî menzil-i mezbûru bâyi‘im gāib ani’l-meclis Mustafa b. Bayram nâm kimesneye bi’t-terâzî ikāle ve beynimizde olan bey‘i fesh ve Davudpaşa Mahallesi’nden hüccet edip menzil-i mezkûrda benim aslâ alâka ve medhalim kalmadı dedikde gıbbe’t-tasdîkı’l-mer‘î hıfzan li’l-makāl bi’t-taleb ketb olundu. Fî-selhi şehri Rebîʻülâhir sene 1121 Şuhûdü’l-hâl: Mustafa b. Şa‘ban, Ali b. İvaz, Hasan b. Mustafa, Ali b. Bâli, Hasan b. Abdullah, Süleyman b. Abdullah ve gayruhum mine’l-huzzâr.