Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 178 Hüküm no: 148 Orijinal metin no: [20b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bali v. Aslan ile ortağı Simo’nun evlerini Hüseyin Çelebi b. Mustafa’ya sattıkları Mahmiye-i İstanbul’da Samatya kurbünde el-Hâc Hüseyin Mahallesi’nde sâkin olup kendi tarafından asıl ve şerîki Bali v. Aslan v. Kaplan nâm zimmî tarafından husûs-ı âti’l-beyânı ikrâra vekîl olduğu Mehmed Çelebi b. Abdullah ve el-Hâc Yusuf b. Abdurrahman nâm kimesneler şehâdetleriyle şer‘an sâbit olan Simo v. ( ) nâm zimmî mahfil-i kazâda işbu râfi‘u’l-kitâb Hüseyin Çelebi b. Mustafa nâm kimesne mahzarında bi’l-asâle ve bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkilim mezbûr ile iştirâk-i seviyy üzere yedimizde mülk ve hakkımız olup mahmiye-i mezbûrede Sinan Paşa Mahallesi’nde vâki‘ bir tarafdan Emine Hatun mülkü ve bir tarafdan Mustafa Çelebi b. Abdullah mülkü ve bir tarafdan İbrahim Çelebi mülkü ve bir tarafdan baʻzan tarîk-i hâs ve baʻzan tarîk-i âm ile mahdûd iki bâb fevkānî oda ve bir bâb tahtânî oda ve bir kenîf ve tûlen iki zirâ‘ ve arzen bir zirâ‘ sekiz parmak arsa üzerinde mebnî dehlîzin havâsını muhtevî mülk menzilimi[zi] tarafeynden îcâb ve kabûlü hâvî şürût-ı müfsideden ârî bey‘-i kat‘î ile merkūm Hüseyin Çelebi’ye nakid yüz iki guruş ile beynimizde ma‘lûm yirmi üç guruş kıymetli mavi çukaya kaplı bir göçen kürk üzerine bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabz u kabûl ettiğinden sonra semeni olan meblağ-ı mezbûr yüz iki guruşu ve sâlifü’z-zikr kürkü merkūm Hüseyin Çelebi bize def‘ ü teslîm biz dahi yedinden ahz u kabz eyledik fîmâ-ba‘d menzil-i mahdûd-ı mezkûr cemî‘ müştemilâtıyla merkūm Hüseyin Çelebi’nin mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 min-şehri Rebîʻülâhir sene 1121 Şuhûdü’l-hâl: Mehmed Çelebi b. Abdullah, Abdi Çelebi b. Yusuf, Ali Beşe b. Mehmed, Yusuf Beşe b. Musa, Berber Mehmed Çelebi, Manav Hasan Beşe b. Mustafa, Mustafa Çelebi b. Şa‘ban, Ali b. İvaz el-Muhzır, Abdullah b. Mustafa el-Muhzır ve gayruhum mine’l-huzzâr.