Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 179 Hüküm no: 149 Orijinal metin no: [20b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Yusuf’un, Hadice bt. Abdullah’ın Vakfı’ndan satın aldığı arsayı vakıf adına mütevelliyesi Râbia Hatun bt. Ali Çelebi’ye geri verip üzerine yaptırdığı binayı da beş yüz guruş bedelle vakfa sattığı Mahmiye-i İstanbul’da Sofular Mahallesi sâkinelerinden Âişe bt. Yusuf Bey nâm hatunun zevci ve tarafından husûs-ı âti’l-beyâna vekîl olduğu zât-ı mezkûreyi ma‘rifet-i şer‘iyye ile ârifân İmâm Hüseyin Efendi b. Kalender ve el-Hâc Mustafa Efendi b. Fazlı şehâdetleriyle şer‘an sâbit olan el-Hâc Mustafa Ağa b. Mehmed nâm kimesne meclis-i şer‘-i şerîf-i enverde ashâb-ı hayrâtdan merhûme Hadice bt. Abdullah nâm sâhibü’l-hayrın oğlu Ali Çelebi’nin kızı ve vakf-ı mezkûra ber-mûceb-i şart-ı vâkıfe mütevelliye olan işbu râfi‘atü’l-vesîka Râbia Hatun muvâcehesinde bi’l-vekâle ikrâr ve takrîr-i kelâm edip vâkıfe-i mezkûrenin vakfından olup mahalle-i mezkûrede vâki‘ bir tarafdan Başyazıcı Ali Efendi bahçe[si] ve bir tarafdan Etmeydanı ve bir tarafdan vakf-ı mezkûrdan olan odalar ve bir tarafdan tarîk-i hâs ile mahdûd olup vakfiye-i ma‘mûlün-bihâsında tasrîh olunduğu üzere vâkıfe-i mezkûrenin evlâd-ı evlâdına süknâsı meşrûta olan menzil bundan esbak vâki‘ olan harîkde muhterik olup arsa-yı sırfa kaldıkda mezkûre Râbia diyâr-ı âharda bulunmağla kāimmakām-ı mütevellî olan Hasan b. ( ) nâm kimesne arsa-yı mezkûreyi müvekkilem mezbûreye yüz beş guruş icâre-i mu‘accele ve beher şehr seksen akçe icâre-i müeccele ile îcâr ve teslîm ol dahi istîcâr ve kabûl ettiğinden sonra hâlâ mezkûre Râbia Hatun’un yedinde olan vakfiye-i ma‘mûlün-bihâsında da tasrîh olunduğu üzere arsa-yı mezkûrenin süknâsı vâkıfe-i mezkûrenin evlâd ve evlâd ve evlâd ve evlâdına meşrûta olduğu mezkûrenin ma‘lûmu olmağla arsa-yı mezkûreden meccânen kasr-ı yed edip ve ihdâs eylediği binâsını dahi beş yüz guruş bedel mukābelesinde meşrûtun-bihâ olan mütevelliye-i mezkûre Râbia Hatun’a ferağ ve tefvîz edip bedel-i merkūm beş yüz guruşu mezkûre Râbia Hatun yedinden tamamen ahz u kabz eyledi müvekkilem mezkûre arsa-yı mahdûd-ı mezkûrede ve üzerinde kendi mâlıyla ihdâs eylediği binâda aslâ alâka ve medhali kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min-şehri Rebî‘ilâhıre sene 1121 Şuhûdü’l-hâl: El-İmâm Hüseyin Efendi [b.] Kalender, el-Hâc Mustafa Efendi b. Muslu, Mustafa Beşe b. Abdullah, Hüseyin Çelebi b. Mahmud, Mehmed b. Abdullah, Mehmed Çelebi [b.] Süleyman