Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 180 Hüküm no: 150 Orijinal metin no: [20b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fersoni bt. Sivastos’un Yalakabad’ın katırlı köyündeki evini, bağını ve bahçesini Dedo v. Duka’ya sattığı Mahmiye-i İstanbul’da Abdi Subaşı Mahallesi sâkinelerinden Fersoni bt. Sivastos nâm Nasrâniye tarafından husûs-ı âti’l-beyânı ikrâra vekîl olduğu zât-ı mezbûreyi ma‘rifet-i şer‘iyye ile ârifân Yani v. Hristodola ve Panayot v. Yanaki şehâdetleriyle şer‘an sâbit olan Dimitri v. Yorgi nâm zimmî mahfil-i kazâda işbu râfi‘u’r-rakīm Dedo v. Duka nâm zimmî mahzarında ikrâr ve takrîr-i kelâm edip akd-i âti’z-zikrin sudûruna değin müvekkilem mezbûre Fersoni’nin yedinde mülk ve hakkı olup vilâyet-i Anadolu’da Yalakābâd kazâsına tâbi‘ Katırlı nâm karyede vâki‘ bir tarafdan Mıhcı Savaklo nâm zimmî menzili ve bir tarafdan Zafire nâm zimmî kayıkhânesi ve bir tarafdan leb-i deryâ ve bir tarafdan tarîk-i âm ile mahdûd iki bâb fevkānî oda ve tahtânî bir mahzen ve havluyu ve dükkân yerini müştemil mülk <> menzilini ve yine karye-i mezbûre sınırı dâhilinde vâki‘ bir tarafdan Canani zimmî bağı ve bir tarafdan Trandi nâm zimmî tarlası ve bir tarafdan Dimitraki Kalfa bağı ve bir tarafdan baʻzan Kiryaki v. Anderon bağı ve baʻzan tarîk-i âm ile mahdûd bir kıt‘a bağını ve yine karye-i mezbûrede vâki‘ bir tarafdan Paskal Çoban bahçesi ve iki tarafdan yine mezbûr çoban menzili ve bağı ve bir tarafdan baʻzan Tanburî Yani bahçesi ve baʻzan tarîk-i âm ile mahdûd bir kıt‘a emrud bahçesini ve yine karye-i mezbûrede vâki‘ bir tarafdan Fondi Reis bahçesi ve bir tarafdan [21a] Ralaki nâm zimmî bahçesi ve bir tarafdan Anaştaş zimmî tarlası ve bir tarafdan tarîk-i âm ile mahdûd def‘a bir kıt‘a emrud bahçesini tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile safka-i vâhide ile bi-cümleti’t-tevâbi‘ ve’l-levâhık merkūm Dedo’ya beş yüz otuz guruşa bey‘ ve temlîk ol dahi vech-i muharrer üzere iştirâ ve temellük ve kabz ve kabûl eylediğinden sonra semeni olan meblağ-ı mezbûr beş yüz otuz guruşu merkūm Dedo yedinden tamamen ahz u kabz edip baʻde’l-yevm zikri mürûr eden menzil ve bağ ve bahçelerde müvekkilem mezbûrenin alâkası kalmayıp mezbûr Dedo’nun mülk ve hakkı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî-selhi şehri Rebîʻülâhir sene 1121 Şuhûdü’l-hâl: Ali Çelebi b. İvaz, Abdullah b. Mustafa, Hüseyin b. Abdullah, es-Seyyid Mustafa b. es-Seyyid Mehmed Kasab, Mikrâscıoğlu Süleyman Yazıcı ve gayruhum mine’l-huzzâr. Papa Anderon v. Papa Angeli, Nikola v. Dimitri, Sato v. Dimitraki, Duka v. Petro, Veniço v. Petrokorbaşı, Dimitri v. İstemat, Petro v. Hristo, Vika v. Roşo, Panayot v. Yanaki.