Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 181 Hüküm no: 151 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud b. Şaşı Mehmed’den vârislerine intikal eden evi usûlsüz olarak vakıf adına satın alan Dilgüşâ Hatun Vakfı mütevellîsi İbrahim Ağa b. Ahmed’in Mahmud’un kızı Emine’nin evdeki hissesini iade etmesi Mahrûse-i Galata’ya tâbi‘ kasaba-i Beşiktaş’da Maçka Mahallesi’nde sâkin iken bundan akdem vefât eden Mahmud b. Şaşı Mehmed b. Abdullah’ın verâseti zevcesi Hadice bt. Abdullah ile sulbiye kızı Âmine’ye münhasıra olduğu mütehakkık oldukdan sonra mezbûre Âmine dîvân-ı hazret-i sadr-ı a‘zamîde ma‘kūd mahfil-i kazâda zikri âtî menzile vâzı‘[atü]’l-yed olan Dilgüşâ Hatun mütevellîsi İbrahim Ağa b. Ahmed mahzarında üzerine da‘vâ ve takrîr-i kelâm edip mahalle-i mezbûrede vâki‘ bir tarafdan es-Seyyid Ali mülkü ve bir tarafdan dere ve bir tarafdan tarîk-i hâs ile mahdûd fevkānî bir oda ve bir sofa ve tahtânî bir oda ve müşterek bi’r-i mâ ve cüneyne ve havlu ve mahtab ve kenîfi müştemil mülk menzil babam müteveffâ-i mezbûrun mülkü olmağla ba‘de vefâtihi bi’l-irsi’ş-şer‘î bize intikāl etmişiken ben müddet-i sefer-i ba‘îd olan âhar diyârda olmağla mütevellî-i mezbûr menzil-i mezkûra bi-gayr-ı hakkın vaz‘-ı yed eder suâl olunup menzil-i mezkûrun sekiz sehminden bana isâbet eden yedi sehm hissemden kasr-ı yed edip bana teslîme tenbîh olunmak matlûbumdur dedikde gıbbe’s-suâl mütevellî-i mezbûr cevâbında işbu yedimde olan hüccetler nâtıka olduğu üzere menzil-i mezbûrun nısfı müteveffâ-i mezbûr Mahmud’un ve nısf-ı âharı zevcesi mezbûre Hadice’nin olup mezbûr Mehmed fevt oldukda deyni için bey‘a arz olunmağla mezbûre Hadice yirmi dört buçuk guruş semen-i medfû‘a baʻde’l-iştirâ üvey oğlu Şahbaz Mustafa nâm kimesneye bey‘ ve mezbûr Şahbaz Mustafa dahi bi-tarîkı’l-istiğlâl mukaddemâ vakf-ı mezbûra mütevellî olan Ahmed Ağa’ya yetmiş guruşa bey‘ ve teslîm ol dahi mâl-ı vakf-ı mezbûr ile bi’t-tevliye iştirâ ve ba‘de’t-tahliyye ücret-i ma‘lûmeye yine mezbûr Şahbaz Mustafa’ya îcâr ol dahi baʻde’l-istîcâr gaybet-i münkatı‘a ile gāib olmağın menzil-i mezkûr vakf-ı mezbûra istiğlâlde kalmağla bi’t-tevliye vaz‘-ı yed ederim deyü takrîr-i meşrûhuna mutâbık iki kıt‘a hüccet ibrâz edicek isre’l-istintak ve’l-inkâr mütevellî-i mezbûrdan yedinde olan hüccetlerin mazmûnlarını mübeyyine beyyine taleb olundukda ityân-ı beyyine için istimhâl etmekle kirâren ve mirâren mehl-i şer‘î ile imhâl olunup ityân-ı beyyineden izhâr-ı acz etmekle istihlâf dahi etmeyip ve mezbûre Âmine müteveffâ-i mezbûr Mahmud’un sulbiye kızı olup menzil-i mahdûd-ı mezkûr vech-i muharrer üzere mülk-i mevrûsu olduğuna mahalle-i mezbûre ahâlîsinden Mustafa Efendi b. Hüseyin ve Mehmed Çelebi b. Rıdvan nâm kimesneler dahi mütevellî-i mezbûr muvâcehesinde şehâdet dahi ettiklerinden sonra mûcebince menzil-i mezkûrun sekiz sehmden mezkûre Âmine’nin hisse-i irsiyyesi olan yedi sehmi ityân-ı beyyine edinceye değin mezbûre Âmine’ye teslîme mütevellî-i mezbûra tenbîh-birle mâ-vaka‘a bi’t-taleb ketb olundu. Fî 3 min-Rebîʻülâhir sene 1121 Şuhûdü’l-hâl: Mustafa Efendi b. Hüseyin, Müezzin Mehmed Çelebi b. Rıdvan, Abbas Efendi b. Halil, Mehmed Efendi b. Süleyman, Abdi b. Süleyman, es-Seyyid Mustafa b. Hasan, es-Seyyid Ali Çelebi b. Ömer, Kara Mehmed b. ( ), Ali b. Süleyman, Mehmed b. Ömer el-Kayyum ve gayruhum mine’l-huzzâr.