Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 182 Hüküm no: 152 Orijinal metin no: [21a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Nebi’nin Ermeni David v. Yakob’dan satın aldığı evin satışını iptal edip evi geri verdiği Mahmiye-i İstanbul’da Sultan Mehmed Hân Câmi‘-i şerîfi kurbünde Hasan Halîfe Mahallesi sâkinlerinden Mehmed b. Nebi nâm kimesne meclis-i şer‘-i şerîf-i enverde işbu râfi‘u’s-sifr David v. Yakob nâm Ermeni muvâcehesinde ikrâr ve takrîr-i kelâm edip mezbûr David bundan akdem mahalle-i mezbûrede vâki‘ bir tarafdan Ahmed Çelebi mülkü ve bir tarafdan mezbûr David’in âhar mülkü ve iki tarafdan tarîk-i âm ile mahdûd bir bâb fevkānî oda ve bir sofa ve bir bâb tahtânî oda ve havlu ve kenîfi müştemil mülk menzilini cümle tevâbi‘i ile üç yüz guruşa bana bey‘ ve teslîm ben dahi ber-vech-i mahkî iştirâ ve kabz ve semen-i mezbûrun elli bir guruşunu mezbûr David’e def‘ ü teslîm etmişidim hâlâ rızâmız ile bey‘-i merkūmu fesh ve ikāle edip menzil-i mahdûd-ı mezbûru merkūm David’e geri redd ü teslîm ol dahi baʻde’l-ahz meblağ-ı mezbûrdan kendiye medfû‘um olan elli bir guruşun yirmi üç guruş ve bir zolotayı merkūm David bana def‘ ben dahi yedinden baʻde’l-kabz bâkī yirmi yedi guruş ve bir sülüs guruş mutâlebesinden mezbûr David’in zimmetini ibrâ ve iskāt eyledim fîmâ-ba‘d menzil-i mahdûd-ı mezbûrda alâka ve medhalim kalmayıp mezbûr David’in mülk ve hakkı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’l-mer‘î mâ-hüve’l-vâki‘ bi’t-taleb ketb olundu. Fî 28 min-şehri Rebîʻülâhir sene 1121 Şuhûdü’l-hâl: Ahmed Çelebi b. Hüseyin, Ali Çelebi b. Yusuf, Ömer Çelebi b. Mustafa, Süleyman Çelebi b. Abdullah, Ahmed Çelebi b. Halil ve gayruhum mine’l-huzzâr.