Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 183 Hüküm no: 153 Orijinal metin no: [21a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah’ın Ezmarağda bt. Nikide’de olan alacağını tahsil edip birbirlerinin zimmetlerini ibra ettikleri Mahmiye-i İstanbul’da Edirnekapısı dâhilinde Neslişah Sultan Mahallesi’nde sâkine olup zâtı ta‘rîf-i şer‘î ile mu‘arrefe olan Âişe bt. Abdullah nâm hatun meclis-i şer‘-i şerîf-i enverde işbu bâ‘isetü’s-sifr Ezmarağda bt. Nikide nâm Nasrâniye muvâcehesinde ikrâr-ı tâm ve takrîr-i kelâm edip bin yüz on senesi ibtidâsından târih-i kitâba gelince mezbûre Ezmarağda ile beynimizde ahz u i‘tâ ve mu‘âmelât-ı şettâ cereyân etmişidi hâlâ beynimizde cereyân eden hesâb ve kitâbımızı görüp mezbûre Ezmarağda zimmetinde on guruş hakkım zuhûr etmekle mezbûre Ezmarağda meblağ-ı mezbûr on guruşu tamamen bana def‘ ü teslîm edip ben dahi yedinden ahz u kabz eylediğimden sonra husûs-ı mezbûra ve târih-i kitâba gelince beynimizde cereyân eden hukūk-ı ma‘lûme ve mechûleye müte‘allika cemî‘ de‘âvî ve mutâlebât ve kâffe-i eymân ve muhâsamâtdan ben mezbûre Ezmarağda’nın zimmetini ibrâ-i âmm-ı kātı‘u’n-nizâ‘la ibrâ ve iskāt eyledim ve mezbûre Ezmarağda dahi kezâlik husûs-ı mezbûra ve gayra müte‘allika âmme-i de‘âvî ve mutâlebâtdan benim zimmetimi ibrâ ve iskāt eyledi fîmâ-ba‘d birbirimiz ile vechen mine’l-vücûh kat‘â da‘vâ ve nizâ‘ımız yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 29 min-şehri Rebîʻülâhir sene 1121 Şuhûdü’l-hâl: Yahya b. Abdullah el-Muhzır, Mehmed Ağa b. Abdullah Kethüdâ-yı muhzırân, Abdullah b. Abdullah, Mustafa Çelebi b. Şa‘ban, Hasan b. Abdullah ve gayruhum mine’l-huzzâr.