Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 183 Hüküm no: 154 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Fâtıma Hatun bt. Mehmed geçinemediği kocası Lütfullah Çelebi b. Hacı Mehmed’den boşandığı Mahmiye-i İstanbul’da Balatkapısı dâhilinde el-Hâc İsa Mahallesi sâkinelerinden olup zâtı ma‘rifet-i şer‘iyye ile ârifân İmâm Ahmed Efendi b. Hüseyin ve Osman Ağa b. Haydar nâm kimesneler ta‘rîfleriyle mu‘arrefe olan Şerife Fâtıma bt. Mehmed nâm hatun mahfil-i kazâda zevc-i dâhili işbu râfi‘u’l-kitâb Lütfullah Çelebi b. el-Hâc Mehmed nâm kimesne mahzarında ikrâr ve takrîr-i kelâm edip mezbûr Lütfullah Çelebi zevcim olup beynimizde hüsn-i zindegānemiz olmamağla zimmetinde mütekarrer ve ma‘kūdün-aleyh olan beş yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Lütfullah Çelebi ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-ı mezbûru kabûl ettiğinden sonra hukūk-ı zevciyete müte‘allika âmme-i da‘vâdan her birimiz âharın zimmetini [ibrâ-i] âmm-ı kātı‘u’n-nizâ‘la ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-selhi şehri Rebîʻülâhir sene 1121 Şuhûdü’l-hâl: Ali b. Abdülhalim, Ali Çelebi b. İlyas, es-Seyyid Mehmed Çelebi b. es-Seyyid Mehmed, İsmail Çelebi b. Seydî, Mustafa Çelebi b. Şa‘ban, Ali Çelebi b. İvaz el-Muhzır, Ali b. Nasuh, Ali b. Mustafa el-Muhzır.