Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 184 Hüküm no: 155 Orijinal metin no: [21b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İvaz v. Hristo ile ortakları Döğenci Kalfa v. Hırsafi, Azaki ve Mihalaki’nin Tahtaminare Mahallesi’ndeki evlerini tüccar Karabet v. Avanis’e sattıkları Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘-i enverden Mevlânâ es-Seyyid Mustafa Efendi b. Abdülkerim ta‘yîn ve irsâl olunup ol dahi mahmiye-i İstanbul’da Tahtaminâre Mahallesi’nde zikri âtî menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî eyledikde mahmiye-i mezbûrede Abdi Subaşı Mahallesi’nde sâkin İvaz v. Hristo ve şerîkleri Döğenci Kalfa v. Hırsaf ve Istaki ve Mihalaki nâm zimmîler meclis-i ma‘kūd-ı mezkûrda işbu râfi‘u’s-sifr tüccârdan Karabet v. Avanis nâm zimmî muvâcehesinde her biri ikrâr ve takrîr-i kelâm edip akd-i âti’z-zikrin sudûruna değin iştirâki’s-seviyy üzere yedimizde mülk ve hakkımız olup mârru’z--zikr Tahtaminâre Mahallesi’nde vâki‘ işbu bir tarafdan Beşe Yuvan veresesi mülkleri ve bir tarafdan baʻzan Tüfenkçibaşı el-Hâc Abdullah menzili ve baʻzan Kabril Ermeni menzili ve bir tarafdan yine bizim âhar mülkümüz ve bir tarafdan tarîk-i âm ile mahdûd tabaka-i ulyâda iki bâb oda ve bir sofa ve bir dehlîz ve tabaka-i vustâda iki bâb oda ve bir sofa ve bir dehlîz ve bir kenîf ve süflâda bir kârgîr bodrum ve bir matbah ve havluda bir bodrumlu kârgîr mahzen ve bir mikdâr havluyu müştemil mülk menzilin mâ-beynimizde olan dolma ve arşun duvarı müşterek olmak üzere menzil-i mezbûru tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezbûr Karabet’e bin üç yüz elli guruş ile hîn-i akidde mevcûd ve adedi nâ-ma‘lûm bir kabza fülûs-ı muzî‘aya bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm eylediğinden sonra semeni olan meblağ-ı mezbûr bin üç yüz elli guruşu mezbûr Karabet zimmî yedinden her birimiz bi-kadri’l-hısas tamamen ahz u kabz eyledik baʻde’l-yevm mahdûd-ı mezkûr cemî‘ müştemilâtıyla mezbûr Karabet’in mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an ba‘s olunan Çukadâr Mustafa Beşe b. Abdullah ve Muhzır Hüseyin b. Süleyman ile meclis-i şer‘a gelip alâ-vukū‘ihî her biri inhâ ve takrîr etmeğin mâ-vaka‘a bi’t-taleb ketb olundu. Fî 26 min-şehri Rebîʻülâhir sene 1121 Şuhûdü’l-hâl: Berber el-Hâc Hasan b. Abdullah, Mehmed Çelebi b. Abdulkādir, el-Hâc Veli Ağa b. Süleyman, es-Seyyid Ahmed Çelebi b. es-Seyyid Ebûbekir, Eyüb Çelebi b. Abdulkādir, el-Hâc Hüseyin Arpacı, Mustafa Ağa b. el-Hâc Ebûbekir, Süleyman Ağa b. el-Hâc Veli, Serbiyon v. Bağdasar, İspandonaki v. Yanaki, Yorgaki v. İspandonaki, Kiryako v. Marko, Andre v. Toma, Kostantin ….?, Sefer v. Kazar, Dimitraşkopak oğlu Kostantin, Cüce Mihail v. Çukacı Aci Tanaş v. Hristo, Yanaki v. Adam.