Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 185 Hüküm no: 156 Orijinal metin no: [21b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. Hacı Mehmed’in Yedikule debbağlarının Ahîbabalığına tayin edildiği Mahmiye-i İstanbul’da Yedikule’de vâki‘ debbâğ tâifesinin kethüdâları Mustafa Ağa b. Osman ve Yiğitbaşı Osman Ağa b. Abdülkerim ve ihtiyârlarından es-Seyyid Ahmed Çelebi b. Ali ve Ali Çelebi b. el-Hâc Mehmed ve Hasan Çelebi b. Ahmed ve el-Hâc Ahmed b. Mehmed ve Mehmed Ağa b. İsmail ve el-Hâc Mustafa b. Yusuf ve İmâm Musa Efendi b. Mehmed ve el-Hâc Ahmed b. Mehmed ve Mehmed Odabaşı ve Usta Abdullah b. Hasan ve Ahmed Beşe b. Mehmed ve İsmail b. Yusuf ve Mustafa b. Mehmed ve Ya‘kub Beşe b. Üveys ve Mustafa b. Mehmed ve Ahmed Beşe b. Hüseyin ve Halil b. İsmail nâm kimesneler ve sâirleri meclis-i şer‘-i şerîf-i enverde tâife-i mezbûreden işbu râfi‘u’l-kitâb Mustafa Ağa b. el-Hâc Mehmed ile Ahîbabaları es-Seyyid el-Hâc Mehmed b. Receb mahzarlarında her biri <> takrîr-i kelâm ve tâʻbir ani’l-merâm edip mezbûr es-Seyyid el-Hâc Mehmed pîr ve ihtiyâr olmağla hizmetinin uhdesinden gelmeğe kādir olmayıp âciz olmağın ve mezbûr Mustafa Ağa her vechile umûr-dîde ve kâr-âzmûde ve cümlemizin muhtârı olup babası dahi Ahîbabamız olmağla mezbûr Mustafa Ağa’yı beynimizde Ahîbaba olmasını ihtiyâr ve Ahîbaba nasb u ta‘yîn olunup ol dahi kabûl ve merâsimini edâya ta‘ahhüd eyledi dediklerinde gıbbe’t-tasdîkı’l-mer‘î mezkûr es-Seyyid el-Hâc Mehmed dahi rızâsıyla Ahîbabalık’dan kasr-ı yed edip ol dahi mezbûrun Ahîbaba olmasını ihtiyâr ve râzı olmağla baʻde’l-yevm mezbûr Mustafa Ağa tâife-i mezbûrenin Ahîbabaları olup beynlerinde olageldiği üzere tedîb ve kimesne dahl ü ta‘arruz etmemek üzere işbu vesîka-i enîka ketb ü tahrîr olunup yedine def‘ ve i‘tâ olundu. Fî-gurreti Cumâdelûlâ sene 1121 Şuhûdü’l-hâl: Kethüdâ Mustafa Ağa b. Osman, Yiğitbaşı Osman Ağa, Ali Çelebi b. Mehmed, Ahmed Çelebi b. Mehmed, Musa Efendi el-İmâm, Mustafa b. Yusuf, Mustafa b. Mehmed, İsmail b. Yusuf, Ahmed Beşe b. Hüseyin, Mustafa b. Mehmed, Ya‘kub b. Üveys ve gayruhum mine’l-huzzâr.