Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 186 Hüküm no: 157 Orijinal metin no: [21b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci Köse Ahmed’in dükkanı önüne ahalinin geliş-gidişini engelleyeceği tespit edilen merdiven yapmasına izin verilmediği Husûs-ı âti’l-beyânın mahallinde keşf ü istihbâr ve tahrîri bâbında sâdır olan fermân-ı celîlü’ş-şâna imtisâlen taraf-ı şer‘den irsâl olunan Mevlânâ Ali Efendi mahmiye-i İstanbul’da Odunkapısı hâricinde Hüseyin b. Ahmed nâm kimesnenin dükkânına varıp ol havâlîde olan ehl-i dükkân ve sefîne reislerinden ve sâir mürûr ve ubûr edip vukūf-ı tammı olan kimesnelerden zikri câʻî husûsu istihbâr eyledikde zikr olunan Odunkapısı hâricinde vâki‘ dükkânda olan el-Hâc Musa b. Ahmed ve el-Hâc Ali b. Abdullah ve Ahmed Beşe b. Hasan ve el-Hâc Ömer b. Mustafa ve Yusuf Beşe b. Mehmed ve el-Hâc Osman b. Mustafa ve el-Hâc Mustafa b. el-Hâc İbrahim ve Zindânkapısı kurbünde olan abacı tâifesinden el-Hâc Ömer Ağa b. Osman ve el-Hâc Mehmed b. Osman [22a] ve el-Hâc Abdullah b. el-Hâc Osman ve el-Hâc İsmail b. el-Hâc Osman ve el-Hâc Mehmed b. Ahmed ve Siyavuş Bey b. Abdullah ve el-Hâc Ömer b. el-Hâc Bekir ve Ömer Çelebi b. Abdullah ve Ahmed Çelebi b. Mustafa ve el-Hâc Ali b. Davud ve el-Hâc İbrahim b. Ahmed ve el-Hâc Mustafa b. el-Hâc İbrahim ve Yemiş İskelesi’nde yemişci olan es-Seyyid el-Hâc Ahmed b. es-Seyyid Abdurrahman ve el-Hâc Mehmed b. Abdurrahman ve el-Hâc Hasan b. Ahmed ve el-Hâc Salih b. Ahmed ve Yusuf Çelebi b. el-Hâc Ahmed ve el-Hâc Abdullah b. Ahmed ve Hasır İskelesi’nden el-Hâc Mahmud b. İsmail ve el-Hâc Ahmed b. Ali ve el-Hâc İsmail b. Abdurrahman ve el-Hâc Mehmed b. Abdurrahman ve el-Hâc Mustafa b. Abdurrahman ve kundakcılardan el-Hâc Ahmed b. Mehmed b. Mehmed ve Mustafa Beşe b. Ali ve Ali Çavuş b. Abdullah ve Mustafa Odabaşı b. Hasan ve Mehmed Beşe b. Abdullah ve kerestecilerden el-Hâc Ahmed b. Mehmed ve el-Hâc Süleyman b. İsmail ve sefîne reislerinden Osman Reis b. Mustafa ve Ömer Beşe b. Mehmed ve Mustafa Reis b. Mehmed ve Osman Reis b. Mehmed ve Ali Reis b. Yusuf ve sâir mürûr ve ubûr eden kimesnelerden Odunkapısı karşısında vâki‘ kasab dükkânı köşesinde olan Keresteci Köse Ahmed dükkânı önünde vâki‘ muzava? mahalde n istihbâr olundukda fi’l-hakīka zikr olunan muzava? kadîmü’l-eyyâmdan bu ana gelinceye değin tarîk-i âmme-i ibâdullâh olup mürûr [ve] ubûr eden âmme-i ibâdullâh ol vechile intifâ‘ edegelmişlerdir mezkûr Köse Ahmed müceddeden binâ ve ihdâs eylediği hâne mahall-i mezkûrdan nerdübân binâ eder ise âmme-i ibâdullâhın mürûr [ve] ubûruna zararı vardır deyü mezkûrûndan her biri alâ-tarîkı’ş-şehâde haber verdiklerini mevlânâ-yı mezkûr mahallinde ketb ü tahrîr ve ma‘an irsâl olunan el-Hâc Hüseyin b. Abdullah ve diğer Hüseyin b. Hasan ile meclis-i şer‘a inhâ eylediklerinden sonra mezkûr Köse Ahmed meclis-i şer‘a ihzâr ve mahall-i mezkûra nerdübân binâ etmemek üzere mezkûr Köse Ahmed’e ba‘de’t-tenbîh mâ-hüve’l-vâki‘ bi’t-taleb ketb olundu. Fî 26 min-Rebîʻülâhir sene 1121 Şuhûdü’l-hâl: el-Hâc Süleyman b. Halil, el-Hâc Hüseyin b. Abdülkerim, Hüseyin Çelebi b. Hasan, el-Hâc Yusuf b. Süleyman ve gayruhum mine’l-huzzâr.