Üsküdar Mahkemesi 1 Numaralı Sicil (H.919-927 / M. 1513-1521) cilt: 1, sayfa: 394 Hüküm no: 721 Orijinal metin no: [109a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Üsküdar’da vefat eden İlyas b. Hızır’ın mirasının varisleri arasında taksim edildiği. Vech-i tezkire oldur ki Bundan akdem nefs-i Üsküdar’da Mehmed Paşa imâreti mahallesinde İlyas b. Hızır fevt olup Pîr Mehmed vasî yetimleri ve Şâhî bt. Mustafa nâm vâlidesi ve diğer Şâhî bt. Hüseyin nâm zevcesi kalıp muhallefâtı beyne? taksîm ve tevzî‘ olunduğu hînde müteveffâ-yı mezkûrun vâlidesi mezkûre Şâhî’ye oğlu metrûkâtından bin yüz altmış beş südüs hisse intikāl ettikde mezkûre Şâhî meclis-i şer‘a zikr olan yetimlere kıbel-i şer‘den vasî nasb olunan Hüseyin b. Kılağuz’ı ihzâr edip üzerine şöyle takrîr-i da‘vâ kılıp zikr olan mahallede hamam civârında oğlum İlyas tasarrufunda olan fevkānî ve tahtânî evler ki mahdûddur kıbleten ve şarken Başcı Hacı evleriyle ve şimâlen ve garben tarîk-i âmla hudûd-ı mezkûre içinde olan çardak evin tahtında taştan ve topraktan binâ olunan ev hayâtıyla oğlum hayâtında iken mülkiyet üzere bana hükm olunup elime hüccet verilmişdir deyip hüccet-i şer‘iyye ibrâz ettikde mazmûn-ı hüccet alâ vech-i …? sâbit olıcak mezkûr-ı mevsûf tahtânî ev mezkûre Şâhî’ye hükm olundukdan sonra da‘vâsın âhir edip oğlumun dahi ketb olunmadık muhallefâtı vardır taleb ederin deyip vasî-yi mezkûr mukābele bi’l-inkâr edip aralarında envâ‘-ı münâza‘a-i kesîre vâki olıcak yetimlere kalan fevkānî ev dahi havlusuyla harâbe müteveccih olup tımar [u] ta‘mirine dahi kādir olmayıp sulh enfa‘ olduğu sebebden Şâhî merkūmeden vasî-yi mezkûra yetimler için muslihûn araya girip dört yüz akçe alıverip ve hâliyen oğlu İlyas’dan intikāl eden bin yüz altmış akçeden ferâgat edip ve sâyir esbâb nizâ‘ından vazgelip ve mezkûr vasî Hüseyin dahi meblâğ-ı mezkûru bi’l-vesâye alıp zikr olan fevkānî evden havlusuyla ve tevâbi‘iyle vazgelip ferâgat edip sulh-ı mezkûru kabûl eyledikden sonra zevcesi Şâhî’ye dahi sâyir muhallefâtından hissesi verilip ve kız karındâşı Fatma dahi benim zikr olan evlerde hakkım yoktur da‘vâ ve nizâ‘ eylemezin eğer edersem ınde’l-hükkâm mesmû‘ olmasın deyu i‘tirâf edip bu vech üzere tarafeynden terk-i da‘vâ ve kat‘-ı nizâ‘ vâki olup müstakil? mezkûr-ı mahdûd ev tevâbi‘iyle mezkûre Şâhî’nin mülkü olup sıhhat-i sulha hükm olundukdan sonra kaziyye sicillâta sebt olundu. Hurrire fî evâhiri Cemâziyelevvel sene hamse ve işrîne ve tis‘a mi’e. Şuhûdü’l-hâl Muhyiddin b. Davud, Hacı b. Balaban, Mü’ezzin Ali b. Yakub, Bâyezid b. Yusuf, Mehmedî b. Musa, İbrahim Halîfe b. Yusuf, Seferşah Halîfe b. Süleyman, Timurhan b. İsmail, Kılağuz b. Aslıhan, Mü’ezzin Mahmud b. İshak ve gayruhum mine’l-hâzırîn.