Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 187 Hüküm no: 159 Orijinal metin no: [22a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şa‘ban Reis b. Hasan b. Abdullah’ın vârislerinin tereke bedelini vasi Mahmud Çelebi b. Yusuf’dan teslim alıp zimmetini ibra ettikleri Vilâyet-i Anadolu’da İnebolu kazâsına tâbi‘ Kestane nâm karye sükkânından olup Karaharman İskelesi’nde bundan akdem vefât eden Şa‘ban Reis b. Hasan b. Abdullah’ın verâseti zevce-i metrûke olup cünûn-ı mutbık ile mecnûne olan Fâtıma bt. Hasan Beşe ve zî-rahm cihetinden el-Hâc Mustafa b. Receb ve Ali b. Mustafa nâm kimesneler ile Sâliha bt. Mehmed ve Âişe bt. Receb nâm hatunlara münhasıra [olduğu] şer‘an zâhir ve müte‘ayyin oldukdan sonra mezbûrân Ali ve Sâliha asâleten ve mezbûre Âişe kendi tarafından asâleten ve karındaşı mezbûr Hacı Mustafa tarafından husûs-ı âti’z-zikre vekîl-i şer‘îsi olmağla vekâleten ve mecnûne-i mezbûre Fâtıma’nın kıbel-i şer‘den mansûb vasîsi olan Mehmed b. Yusuf vesâyeten meclis-i şer‘-i şerîf-i enverde müteveffâ-i mezbûrun vasiyy-i muhtârı olmağla terekesine bi’l-vesâye vâzı‘u’l-yed olan işbu bâ‘isü’l-kitâb Mahmud Çelebi b. İsmail nâm kimesne mahzarında her biri asâleten ve vekâleten ve vesâyeten [i]krâr-ı tâm ve takrîr-i kelâm edip müteveffâ-i mezbûrun vasiyy-i muhtârı olan mezbûr Mahmud Çelebi müteveffâ-i mezbûrun bi’l-cümle terekesinden ber-mûceb-i defter-i kassâm nakid iki yüz elli dokuz guruşunu ahz u kabz edip hâlâ taleb eylediğimizde mezbûr Mahmud Çelebi makbûzu meblağ-ı mezbûr iki yüz elli dokuz guruşu tamamen bize def‘ ü teslîm biz dahi yedinden ahz u kabz edip husûs-ı mezkûra müte‘allika cemî‘ de‘âvî ve mutâlebât ve kâffe-i eymân ve << mutâlebâtdan>> muhâsamâtdan mezbûr Mahmud Çelebi’nin zimmetini ibrâ-i âmm-ı kātıʻu’n-nizâ‘la ibrâ ve iskāt eyledik fîmâ-ba‘d husûs-ı mezbûra müte‘allik mezbûr Mahmud Çelebi ile vechen mine’l-vücûh ve sebeben mine’l-esbâb kat‘â da‘vâ ve nizâ‘ımız yokdur dediklerinde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 2 min-Cumâdelûlâ sene 1121 Şuhûdü’l-hâl: el-Hâc Ahmed Efendi b. Mehmed Efendi, Mehmed Efendi b. Veli el-Müezzin, el-Hâc Mehmed b. Ali, es-Seyyid Abdülbâki Çelebi b. İbrahim, Mustafa b. Mehmed, Mehmed Efendi b. Mustafa, es-Seyyid Mustafa Efendi Aynîzâde, Süleyman Çelebi b. Abdullah, Hasan Beşe b. Abdurrahman ve gayruhum mine’l-huzzâr.