Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 188 Hüküm no: 160 Orijinal metin no: [22a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Hızır’ın boşandığı kocası Ali Beşe b. Ömer’den mehir ve nafaka bedelini teslim alarak birbirlerinin zimmetlerini ibra ettikleri Mahmiye-i İstanbul’da Gül Câmi‘-i şerîfi Mahallesi sâkinelerinden olup zâtı ma‘rifet-i şer‘iyye ile ârifân İmâm es-Seyyid İbrahim Efendi b. Abdülfettâh ve Müezzin Hasan Halîfe b. Ali nâm kimesne ta‘rîfleriyle mu‘arrefe olan Âişe bt. Hızır nâm hatun mahfil-i kazâda zevc-i sâbıkı işbu râfi‘u’l-vesîka Ali Beşe b. Ömer nâm kimesne mahzarında ikrâr ve takrîr-i kelâm edip bundan akdem mezbûr Ali Beşe zevcim olup târih-i kitâb günü beni bâyinen tatlîk etmekle zimmetinde mütekarrer ve ma‘kūdün-aleyh olan on bin akçe mehr-i müeccelimden dört bin akçe ve nafaka-i iddet-i mu‘ayyene-i ma‘lûmem ve meûnet-i süknâm için dahi bi’t-terâzî ta‘yîn olunan beş yüz akçe ki cem‘an dört bin beş yüz akçeyi mezbûr Ali Beşe bana def‘ ü teslîm ben dahi yedinden tamamen ahz u kabz eylediğimden sonra bâkī kalan altı bin akçe mehr-i müeccel-i mezkûreye müte‘allika ve târih-i kitâba gelince beynimizde cereyân eden sâir ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve kâffe-i mutâlebât ve eymân ve muhâsamâtdan ben mezbûr Ali Beşe’nin zimmetini ibrâ-i âmm-ı kātıʻu’n-nizâ‘la ibrâ ve iskāt edip ol dahi kezâlik hukūk-ı zevciyete müte‘allika ve târih-i kitâba gelince beynimizde cereyân eden sâir ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve kâffe-i mutâlebât ve eymân ve muhâsamâtdan benim zimmetimi ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 2 min-Cumâdelûlâ sene 1121 Şuhûdü’l-hâl: el-Hâc Ömer b. Hüseyin, Mustafa Çelebi b. Ali, el-Hâc Süleyman b. Ali, Nebi Çelebi b. Abdullah, es-Seyyid İbrahim Efendi b. Abdülfettâh, Hasan Efendi b. Ali ve gayruhum mine’l-huzzâr.