Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 189 Hüküm no: 162 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mehmed’in boşandığı kocası Abdullah Çelebi b. Mehmed’in ödemesi şartıyla çocukları İbrahim’e nafaka tayin edildiği Mahmiye-i İstanbul’da Atpazarı kurbünde Manisalı Çelebi Mahallesi’nde sâkine olup zâtı ta‘rîf-i şer‘î ile mu‘arrefe olan işbu râfi‘atü’l-kitâb Fâtıma bt. Mehmed nâm hatun mahfil-i kazâda zevc-i sâbıkı Abdullah Çelebi b. Mehmed nâm kimesne mahzarında takrîr-i kelâm ve tâʻbir ani’l-merâm edip zevcim mezbûr Abdullah’ın firâşından hâsıl ve benden mütevellid bi-hakkı’l-hıdâne hâlâ hacr u terbiyemde olan işbu sadrî sagīr oğlum İbrahim’in nafakaya ihtiyâcı olmağla babası mezbûr Abdullah üzerine kıbel-i şer‘den kadr-i ma‘rûf nafaka-bahâ farz ve takdîr olunmak matlûbumdur dedikde gıbbe’t-tasdîk hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri dahi sagīr-i mezbûr İbrahim’in ancak nafaka bahâsıʼçün babası mezbûr Abdullah üzerine târih-i kitâbdan beher yevm bi’t-terâzî beşer akçe nafaka-bahâ farz ve takdîr edip meblağ-ı mefrûz-ı mezbûru sagīr-i mezbûrun nafakasına harc ve sarfa ve lede’l-iktizâ istidâneye ve inde’z-zafer babası mezbûr Abdullah üzerine rücû‘a mezbûre Fâtıma’ya izin vermeğin mâ-vaka‘a bi’t-taleb ketb olundu. Fî-gurreti Cemâziyelevvel sene 1121 Şuhûdü’l-hâl: Mustafa b. Receb, Mahmud b. Mehmed, Mustafa Çelebi b. Şa‘ban, Ali b. İvaz, Ali b. Bâli ve gayruhum mine’l-huzzâr.