Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 190 Hüküm no: 163 Orijinal metin no: [22b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havvâ bt. Mustafa’nın yanında bulunan kızı Râbia’nın yanında kalmaya devam etmesi hususunda boşandığı kocası Mehmed Beşe b. Mustafa ile anlaştığı <> Mahmiye-i İstanbul’da Altımermer kurbünde Seydî Ömer Mahallesi’nde sâkine olup zâtı Halil b. İbrahim ve Hasan b. Abdullah nâm kimesneler ta‘rîfleriyle mu‘arrefe olan Havvâ bt. Mustafa nâm hatun meclis-i şer‘-i şerîf-i enverde zevc-i sâbıkı işbu râfi‘u’l-kitâb Mehmed Beşe b. Mustafa nâm kimesne mahzarında ikrâr ve takrîr-i kelâm edip mezbûr Mehmed Beşe zevcim olup bundan akdem beni bâyinen tatlîk etmekle mezbûrun firâşından hâsıla ve benden mütevellide bi-hakkı’l-hıdâne hacr u terbiyemde olan sagīre kızım Râbia’yı yedi yaşına değin kendi mâlımdan infâk ve iksâ edip baʻde’l-yevm mezkûr Mehmed Beşe kızım sagīre-i mezbûreyi benden taleb ve ahz etmeyip ben dahi nafaka ve kisve-bahâ farz ve takdîr ve taleb etmemek üzere birbirimiz ile kavl ü ittifâk ve ahd ü mîsâk eyledik dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 2 min-Cumâdelûlâ sene 1121 Şuhûdü’l-hâl: Mustafa Çelebi b. Şa‘ban, Hasan Çelebi b. Abdullah, Hasan Çelebi b. Mustafa, Ali Çelebi b. İvaz, Süleyman Çelebi b. Abdullah ve gayruhum mine’l-huzzâr.