Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 190 Hüküm no: 164 Orijinal metin no: [22b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Musa Ağa b. Hüseyin’in koyunlarını otlatan Çoban Kosta v. Dimitri’nin üç senelik hizmetini ödemesi Çoban tâifesinden işbu râfi‘u’s-sifr Kosta v. Dimitri nâm zimmî dîvân-ı sadr-ı aʻzamîde ma‘kūd mahfil-i kazâda Musa Ağa b. Hüseyin nâm kimesne mahzarında üzerine da‘vâ ve takrîr-i kelâm edip bundan akdem mezbûr Musa Ağa’ya koyunlarını ra‘y için senede otuz guruş ücret ile nefsimi îcâr ol dahi ber-vech-i muharrer istîcâr ve kabûl ettiğinden sonra üç sene koyunlarını ra‘y edip edâ-yı hizmet etmemle suâl olunup otuz guruşdan üç senede müctemi‘ olan doksan guruş ücretimi bana edâya tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden olup Rumelihisarı’nda Koruluk Mahallesi sükkânından Mustafa Ağa b. Musa ve Ali Çelebi b. Mustafa nâm kimesneler li-ecli’ş-şehâde mahfil-i kazâya hâzırân olup isre’l-istişhâd fi’l-hakīka işbu müdde‘î-i mezbûr Kosta bundan akdem mezbûr Musa Ağa’ya koyunlarını ra‘y için senede otuz guruş ücret ile nefsini bizim huzûrumuzda îcâr ol dahi ber-vech-i muharrer baʻde’l-istîcâr ve’l-kabûl müdde‘î-i merkūm mezbûr Musa Ağa’nın üç sene koyunlarını ra‘y ve edâ-yı hizmet eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘î-i merkūmun vech-i meşrûh üzere üç senede ücreti olan cem‘an doksan guruşu müdde‘î-i merkūma edâ ve teslîme mezbûr Musa Ağa’ya tenbîh-birle mâ-vaka‘a bi’t-taleb ketb olundu. Fî 2 min-Cumâdelûlâ sene 1121 Şuhûdü’l-hâl: el-Hâc Mustafa Efendi tâbi‘-i efendi, Ebûbekir Efendi Nâib-i ayak, Hüseyin Beşe Çukadâr, Süleyman Ağa Ser-muhzırân, Mustafa Çavuş b. Hasan ve gayruhum mine’l-huzzâr.